Aqtóbede koronavırýs ınfektsııasyna shaldyqqandar sany artty

AQTÓBE. QazAqparat – «Jasyl» aımaqtaǵy Aqtóbe oblysynda bir táýlikte 21 adamnan koronavırýs anyqtaldy. Epıdemıolog mamandar saqtyq sharasyn kúsheıtýdi surady, dep habarlaıdy QazAqparat tilshisi.

Ótken táýlikte óńirde koronavırýs ınfektsııasyna shaldyqqan adamdar sany kúrt artty. Barlyǵy 21 jaǵdaı tirkeldi. Dertke shaldyqqandar — Aqtóbe qalasy, Mártók, Muǵaljar aýdandarynyń turǵyndary. Dárigerler olarmen jaqyn qarym-qatynasta bolǵan taǵy 20-dan astam adamdy baqylaýǵa alǵan.

«Aqtóbe oblysynda 108 naýqas em qabyldap jatyr. Onyń ishinde 37 naýqas ınfektsııalyq statsıonarda. Barlyǵy 9 naýqas jansaqtaý bóliminde bolsa, onyń bireýi ókpeni jasandy jeldetý apparatyna qosylǵan. Aýrý belgileri anyqtalǵan jaǵdaıda birden ýchaskelik dárigerge habarlasý kerek. Óz betimen emdelýge bolmaıdy», - dedi Aqtóbe oblystyq densaýlyq saqtaý basqarmasy basshysynyń orynbasary Bekbolat Іzbasarov.

Aqtóbede taǵy 60 adam karantınde jatyr. Epıdemıolog mamandardyń aıtýynsha, óńirde ósim bar. Sondyqtan araqashyqtyty saqtap, maska taǵyp, antısektıkti qoldanyp júrgen durys.

«Batys Qazaqstan, Atyraý oblystarynda koronavırýs juqtyrǵandar sany kóp. Sońǵy táýlikte Aqtóbede de ósti. Kóp adam jınalatyn orynǵa barmaǵan jón. Ǵımarat ishinde, qoǵamdyq kólikte maska taqqan durys», - dedi oblystyq sanıtarlyq-epıdemıologııalyq baqylaý departamenti basshynyń orynbasary Muhtar Serbaev.