Aýa raıy
Astana -1 °S
Almaty 7 °S
valıýta baǵamy
USD 421.58
EUR 496.83
RUB 5.53
CNY 62.20

Aqtóbede koronavırýstyń ekinshi tolqynyna daıyndyq pysyqtaldy

2020 jyldyń 22 qyrkúıek 2020 17:20

AQTÓBE. QazAqparat - Koronavırýs indetine baılanysty epıdemıologııalyq jaǵdaı oblys ákimi Ońdasyn Orazalınniń baqylaýynda, dep habarlaıdy QazAqparat tilshisi oblys ákiminiń baspasóz qyzmetine silteme jasap.

Óńirde koronavırýs indeti men pnevmonııanyń jańa jaǵdaılary anyqtalǵan joq. Osy aptada barlyq provızorlyq statsıonar jabyldy. Tek juqpaly aýrýlar aýrýhanasy ǵana jumys istep tur. Buǵan qosa kúzgi tolqynǵa daıyndyq sharalary júrip jatyr.

«3588 tósek-oryn daıyndalyp qoıdy. Olar eki sanatqa bólinetin bolady. Aqtóbe medıtsına ortalyǵy men ftızıopýlmonologııalyq ortalyq sııaqty birinshi sanattaǵy mekemelerde 1040 tósek-oryn, ekinshi sanattaǵy statsıonarlarda 2548 tósek-oryn qarastyrylǵan. 305 reanımatsııalyq kereýet ashý josparda bar»,- dep baıandady oblys ákiminiń orynbasary Nurjaýǵan Qalaýov.

Medıtsına mekemeleriniń materıaldyq-tehnıkalyq bazasy nyǵaıtylyp jatyr. Qazan aıynda 187 ókpeni jasandy jeldetý apparaty jetkiziledi dep kútilip otyr. Taǵy bir kompıýter tomografy, 13 statsıonarlyq rentgen apparaty, eki jyljymaly rentgen apparaty, avtonomdy ottegi stansasy men eki jyljymaly medıtsınalyq keshen, sonymen qatar basqa da qural-jabdyqtar satyp alynady.





Aıta keteıik, 1547 tósek orynnyń 1438-i ottegimen, úsh statsıonar ortalyqtandyrylǵan ottegimen qamtamasyz etilgen. Óńirdegi statsıonarlardyń avtoparki 41 mashınamen tolyǵady. Budan buryn jeti jedel járdem kóligi satyp alynǵan bolatyn. Statsıonarlar men provızorlarda dári-dármekter men jeke qorǵanys zattarynyń qajetti qory bar. Kadr máselesi qalalyq emhanalardyń, aýrýhanalardyń qyzmetkerleri men M.Ospanov atyndaǵy BQMÝ-diń professor-oqytýshylar quramy esebinen sheshilmek. 37 baqylaý toby karantın tártibin buzǵan 827 jaǵdaıdy anyqtap, 699 materıal qaraldy. Barlyǵy 55,3 mln teńge aıyppul salyndy.

Jıyn sońynda Ońdasyn Orazalın aýdan ákimderine daıyndyq jumystaryn jandandyryp, tumaýǵa qarsy vaktsına egý kerektigi týraly eske saldy.





Joǵary qaraı