Aqtóbede múgedek erli-zaıyptyny kóseýmen urǵan kúdikti ustaldy
AQTÓBE. QazAqparat – Aqtóbe polıtsııasy qaraqshylyq jasaǵan kúdiktini ustady. Ol úı ıelerin uryp-soǵyp, qolda bar aqshasyn alyp ketken, dep habarlaıdy QazAqparat tilshisi.
Polıtsııaǵa belgisiz bireýdiń tereze arqyly kirip, otbasy múshelerin kóseýmen uryp soqqany týraly aqparat tústi. Kúdikti erli-zaıypty múgedektiń aqshasyn da alyp ketken.
«Zardap shekkenderdiń ekeýi de múgedek. Kúdikti qarııalardy kóseýmen uryp-soqqan. Keıin 20 myń teńgeni alyp, qashyp ketken. Qylmysty ashý úshin jedel-tergeý toby qurylyp, polıtsııany barlyq jasaǵy izdeý jumysyna jumyldyryldy. Kóp uamaı 45 jastaǵy kúdikti anyqtalyp, ustaldy. Ol aqshany óz qajettiligine jumsap úlgergen», - dedi oblystyq PD baspasóz qyzmetiniń jetekshisi Erbolat Sarqulov.
Qazirgi ýaqytta Qylmystyq kodekstiń «Qaraqshylyq» baby boıynsha sotqa deıingi tergeý júrip jatyr. Kúdikti Aqtóbe qalasynyń ýaqytsha ustaý ızolıatoryna qamaldy.
