Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Aqylbek Kúrishbaev áleýmettik mańyzdaǵy taýarlar tizimin keńeıtýdi usyndy

2021 jyldyń 11 maýsym 2021 13:03

NUR-SULTAN. QazAqparat – Búgin Senattaǵy Qazaqstannyń agroónerkásiptik keshenin damytýdyń 2017-2021 jyldarǵa arnalǵan memlekettik baǵdarlamasyn iske asyrý taqyrybyndaǵy Úkimet saǵatynda depýtat Aqylbek Kúrishbaev áleýmettik mańyzdaǵy taýarlar tizimin keńeıtýdi usyndy, dep habarlaıdy QazAqparat tilshisi.

«Qoǵamdaǵy eń ózekti másele – ol azyq-túliktiń qymbattaýy.

Esep komıtetiniń qorytyndysyna sáıkes, bizde azyq-túlik qaýipsizdiginiń kórsetkishteri durys anyqtalmaıdy eken. Olardy esepteý úshin tamaq ónimderin tutynýdyń tıisti fızıologııalyq normalary qoldanylmaıdy. Sondaı-aq halyqtyń azyq-túlikpen qamtamasyz etilýin anyqtaý ádistemeleri Úkimettiń normatıvtik-quqyqtyq aktilerimen bektilmegen. Bul turǵyda Aýyl sharýashylyǵy mınıstrligi ne istep jatyr? Ekinshi suraqqa toqtalsam, memleket retteıtin áleýmettik mańyzy bar azyq-túlik ónimderiniń tizimine Reseıde 24 túri, Belarýs Respýblıkasynda – 28 túri engen. Al Qazaqstanda bar bolǵany - 19, bizde bul tizimde ettiń, kókónistiń, jarmanyń keıbir túrleri joq. Al jemis-jıdek pen balalar taǵamy tipti enbegen. Bizdiń oıymyzsha, bul durys emes! Bizdiń halqymyz tek azyq-túliktiń 19 túrin tutynbaıdy. Osyǵan oraı, elimizde baǵasyn memleket retteýi tıis áleýmettik mańyzy bar azyq-túlik taýarlarynyń tizbesin keńeıtý týraly pikirlerińiz qalaı?», - dep surady senator Aqylbek Kúrishbaev.

Óz kezeginde Aýyl sharýashylyǵy mınıstri Saparhan Omarov bıyl Esep komıteti vedomstvony teksergen kezde fızıologııalyq normalardy retteıtin qaǵıdanyń joq ekenine nazar aýdarǵanyn atap ótti.

«Biz onymen kelisemiz. Bul qaǵıda bolǵan, biraq mınıstrliktiń óziniń ishinara buıryǵymen bekitilgen. Sondyqtan qazir Esep komıtetiniń bergen usynysyn eskere otyryp, osy qaǵıda daıyndaldy. Qazir qaǵıda memlekettik organdarmen kelisilip jatyr. Osy aıdyń ishinde ol bekitilýi kerek. Ekinshi suraqqa keletin bolsam, búginde Qazaqstanda áleýmettik mańyzdaǵy taýarlardyń ishinde 19 azyq-túliktiń túri engizilgen. Biraq mınıstrlik retinde baǵa boıynsha, ónimmen qamtamasyz etilýi deńgeıin ózimiz 29 azyq-túlik túri boıynsha júrgizip kelemiz, ıaǵnı mańyzdy ónimder qamtylǵan. Al Reseı men Belarýste bizge tán emes biraz azyq túri bar. Mysaly, olardyń tiziminde shoshqa eti, keptirilgen balyq sııaqty ónim bar. Belarýste kókónister eskirmegen», - dedi mınıstr.

Sonymen qatar S. Omarov senator Aqylbek Kúrishbaevtyń usynysyn qoldaıtynyn aıta kele, atalǵan másele boıynsha memlekettik organdarmen birlese tıisti talqylaý júrgizý kerek ekenin jetkizdi.


Joǵary qaraı