Aýa raıy
Astana 6 °S
Almaty 11 °S
valıýta baǵamy
USD 421.58
EUR 496.83
RUB 5.53
CNY 62.20

Aqjaıyqta Juban ortalyǵy ashyldy

2020 jyldyń 26 qyrkúıek 2020 07:30

ORAL. QazAqparat - Batys Qazaqstan oblysynda Qazaqstan halyq jazýshylary, aqyndar, Memlekettik syılyqtyń laýreattary Juban Moldaǵalıevtiń 100, Qadyr Myrza Álıdiń 85 jyldyǵyna arnalǵan mereıtoılyq sharalar ótýde, dep habarlaıdy QazAqparat tilshisi.

Juban aqynnyń ǵasyrlyq mereıtoıy týǵan jeri - Aqjaıyq aýdanynda bastaldy.

Aldymen meımandar Saıqudyq aýylyndaǵy aqyn atyndaǵy mektepke bet túzedi. Sodan keıin Juban aýylyndaǵy Talap orta mektebinde aqyn synyby ashyldy.

Negizgi sharalar aýdan ortalyǵy - Chapaev aýylynda ótti.

Osynda Juban ortalyǵynyń ashylý rásimine qatysqan BQO ákiminiń birinshi orynbasary Muhtar Mankeev eli barda, azamatyn qúrmetteıtin halqy barda Juban aqynnyń máńgi jasaıtynyn jetkizdi.





«Esimi alty alashtan asyp, «Men - qazaqpyn!» dep barsha álemge jar salǵan aqynnyń esimi umytylmaq emes. Akademık Zeınolla Qabdolov: «Juban - qazaq poezııasyndaǵy, ádebıetimizdegi iri qubylys. Ol - Oraldyń ǵana emes, qazaqtyń Jubany» degen bolatyn. Juban eli aqyn murasyn úlgi etip, keler ǵasyrlarǵa da jalǵaıtyny anyq», dedi M.Mankeev.

Almatydan arnaıy kelgen aqynnyń jary Sofııa Málikqyzy Juban eline shynaıy rızashylyǵyn jetkizdi.





«Men 1947 jyly osy elge kelin bolyp tústim. Qalanyń qyzy bolsam da, aýyldyń barlyq sharýasyn istedim. Men kóp bata alǵan adammyn. Osy kúnge de jetip otyrǵanym - sonyń arqasy dep oılaımyn», dedi ol.





«Biz Juban aǵanyń kózin kórip, sózin estigen urpaqpyz. Qyran qabaqty, báıterekteı boıymen, sańqyldaǵan daýsymen óleń oqyǵan sáti, óziniń susymen, mysymen basyp turatyn aqyn kelbeti áli kóz aldymyzda. Ol kisi Qazaqstan Jazýshylar odaǵyn basqaryp turǵan kezde meni múshelikke qabyldaǵany esimnen ketpeıdi. Jubaǵań burynǵy Odaq dúrkirep turǵan dáýirde Rasýl Gamzatov, Davıd Kýgýltınov, Edýardas Mejelaıtıs, Mustaı Kárim sııaqty uly aqyndarmen terezesi teń, qatar júrgen eń betke ustar aqyndarymyzdyń biregeıi boldy. Bizdiń usynysymyzben Juban Moldaǵalıevtiń 100 jyldyǵy halyqaralyq TÚRKSOI uıymynyń bıylǵy «Túrki mádenıetiniń kúntizbesine» de engizilip, keńinen atalyp ótiletin boldy. Osydan on jyl buryn aýdan ortalyǵynda eńseli eskertkishi boı kóterse, búgin Juban ortalyǵy ashylyp otyr. Munda kelgen adam ádebıet álemine engendeı bolady. Dızaıny ádemi, bıik talǵammen jasalǵan. Juban sýretteri de aıryqsha kóz tartyp tur», dedi mereıtoıǵa arnaıy kelgen aqyn, Memlekettik syılyqtyń laýreaty, Qazaqstan Jazýshylar odaǵynyń basqarma tóraǵasy Ulyqbek Esláýlet.








Aqyn, Memlekettik syılyqtyń laýreaty, Qazaqstan Jazýshylar odaǵy BQO fılıalynyń tóraıymy Aqushtap Baqtygereeva 21 jasynda qazaqpyn dep óleń jazyp, sol rýhty keýdesinde óshirmeı, 43 jasynda ólmes poemaǵa aınaldyrǵan aqyn rýhynyń máńgi óshpeıtinin aıtyp, Juban ortalyǵyn salýǵa úles qosqan kásipker azamattarǵa alǵysyn jetkizdi.

Kompozıtor, jazýshy, Qazaqstannyń eńbek sińirgen qaıratkeri Ilıa Jaqanov aqynmen shyǵarmashylyq baılanysta bolǵandyǵy jóninde esteligimen bólisip, atyraýlyq sýretshi Qambar Amanov salǵan «Edil-Jaıyq» týǵan kún» atty kartınany Juban ortalyǵyna syıǵa tartty.

Qadyr aqynnyń 85 jyldyq mereıtoıy týǵan jeri - Syrym aýdanynda bastaldy.

Qos aqynǵa arnalǵan sharalar búgin Oral qalasynda jalǵasady.

Eske sala keteıik, budan buryn BQO-da «Jaıyqtyń qos qyrany» atty respýblıkalyq aqyndar aıtysy ótetinin jazǵan bolatynbyz.

Sýretterdi túsirgen Nurbek Ihsan



Joǵary qaraı