Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Alaman marafon: 15 jelaıaq Nur-Sultannan Oralǵa jolǵa shyqty

2021 jyldyń 26 qarasha 2021 12:20

NUR-SULTAN. QazAqparat – Táýelsizdiń 30 jyldyǵyna arnalǵan alaman marafonǵa qatysatyn 15 tájirıbeli jelaıaqty elorda turǵyndary sát sapar tilep, shyǵaryp saldy. Sımvolıkalyq mánge ıe 2021 shaqyrym joldy marafonshylar 8 kúnde júgirip ótpekshi, dep habarlaıdy QazAqparat tilshisi.

Qystyń kózi qyraýda eki myń shaqyrymnan astam qashyqtyqty jolsyzben júgirip ótýge bekingen táýekelshil topty shyǵaryp salý úshin elorda turǵyndary shyńyltyr aıazǵa qaramastan kóp jınaldy. Memlekettik rámizder alańyndaǵy shara kishigirim merekelik kontsertke ulasyp, rýhty sózder men aq batalar aıtyldy.










Marafonshylarǵa aq jol tileı kelgenderdiń arasynda Olımpıada chemıpony Serik Sápıev te boldy.

«Osy sharaǵa bastamashy bolǵan Qazaqstan qurylysshylar odaǵynyń basshysy Talǵat Erǵalıevke alǵys aıtqym keledi. Bul araǵa salamatty ómir saltyn ustanatyn otandastarymyz jınalyp otyr. Tek ustanyp qana qoımaı, búgingi áreketterimen nasıhattap jatyr desek te bolady. Sportshy retinde dene shynyqtyryp, sportpen shuǵyldanatyn adamdardyń qatary kóbeıip jatqanyn kórý janǵa jaǵymdy. Memleket basshysynyń buqaralyq sportty damytýǵa basa kóńil bólýdi tapsyrǵanyn bárimiz bilemiz. Búgingi shara da sol ustanymmen úndesedi. Buqaralyq sport damyǵanda ǵana aramyzdan chemıpondar kóptep shyǵady. Ózim bul marafonǵa qatyspasam da, qoldaý bildirý úshin kelip turmyn», - dedi boksshy.





Uıymdastyrýshylardyń aıtýyna qaraǵanda, Táýelsizdiktiń 30 jyldyǵyna arnalǵan sharaǵa QR Prezıdenti Ákimshiligi, Nur Otan partııasy, Aqparat jáne qoǵamdyq damý, Іshki ister, Mádenıet jáne sport mınıstrlikteri, elorda ákimdigi qoldaý bildirip otyr.

Al Stroiklass qurylys kompanııasy alaman marafonǵa demeýshi retinde atsalysýda.

Marafonshylarǵa jınalǵan qaýym atynan QR Parlamenti Májilisi Halyqaralyq qatynastar, qorǵanys jáne qaýipsizdik komıtetiniń múshesi Abaı Tasbolatov lebiz arnady.

«Osyndaı keń baıtaq jerdi keshegi babalarymyz kúshi men rýhy bıik bolǵandyqtan, myqty minezben qorǵaı alǵan. Búgingi marafonǵa qatysýshylardyń arasynda 62 jastaǵy azamat ta bar. Batyr babalardan qalǵan rýhtyń arqasynda mynadaı aıazda 2000 shaqyrymdy kún, tún demeı júgirip ótýge bekinip otyr. Qaýipsizdik shartyna qaıshy bolǵandyqtan asfalt jolmen júgirýge ruqsat berilgen joq. Sondyqtan batyrlar Oralǵa deıin aýyl-aýyldyń arasymen júgirip jetpekshi. Keı adamdar kólikpen qatynaýdy qıyn kóretin shalǵaıǵa bulardyń jaıaý attanǵaly otyrǵanyn batyrlyq dep esepteý kerek», - dedi ol.




Búgin elordadan shyqqan marafonshylar Kókshetaý, Petropavl, Qostanaı, Aqtóbe qalalaryn basyp ótip, Oralǵa 8 kúnde jetemiz dep otyr. Urandary – «Aıańmen de, kólikpen de 1 shaqyrym da júrmeımiz».

Uıymdastyrýshylardyń aıtýynsha, alaman marafonnyń marshrýtynda tabıǵı kedergiler men qıyn asýlar da kezdesedi. Muny olar Táýelsizdiktiń 30 jylyndaǵy táýekelder men qaterlerdiń sımvoly retinde tańdaǵan eken.

15 jelaıaqtyń ishinde memlekettik qyzmetshiler de bar bolyp shyqty. 62 jastaǵy Talapnur Baızaq salamatty ómir saltyn ustanyp kele jatqanyna 40 jyldan asqanyn aıtady.

«Buǵan deıin elordadan Almatyǵa deıin 1270 shaqyrymdy qystygúni júgirip ótken bolatynmyn. Bul jolǵy marafon uzaqtyǵy boıynsha odan asyp keteıin dep tur. Marafonshy únemi babynda bolýy kerek. Kúnde tańǵy saǵat 6.00-7.30-ǵa deıin júgirip, shynyǵamyn. Jyldyń tórt mezgilinde de júgirýdi toqtatpaǵandyqtan, mundaı aýa raıynda marafonǵa qatysý tańsyq deýge kelmeıdi. Ózim QR Aýyl sharýashylyǵy mınıstrliginde jumys isteımin. Stroiklass kompanııasynyń sportqa áýes jigitterimen birge júgiretin edik. Marafon týraly solardan estip, qatysýǵa bel baıladym», - deıdi Talapnur Baızaq.




Marafon marshrýtyna kirgen eldi mekender marafonshylardyń aldynan shyǵyp, qurmet kórsetiledi dep kútilýde.







































Joǵary qaraı