Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Álem dıalogtyń jańa formattaryn izdeı bastady – Darıǵa Nazarbaeva

2021 jyldyń 16 qyrkúıek 2021 13:41

NUR-SULTAN. QazAqparat – Shynaıy táýelsizdik pen egemendik ulttyń básekege qabiletti medıakontent jasaı alýymen ólshenedi. Bul pikirdi Eýrazııalyq Medıa forýmnyń uıymdastyrý komıtetiniń tóraıymy Darıǵa Nazarbaeva XVII forýmnyń ashylýynda aıtty, dep habarlaıdy QazAqparat tilshisi.

«Táýelsizdiktiń 30 jyldyǵy BAQ-tyń ekonomıka men qoǵamdyq ómirdegi rólin baǵalaý úshin jaqsy sebep bolyp otyr. Jahandyq aqparattyq orta memlekettik shekaralarmen sáıkese qoımaıdy, ulttyq jáne mádenı egemendikke aıtarlyqtaı qaýip tóndirip keledi. Bizdiń tarıhymyz, mádenıetimiz, tilimiz – myzǵymas qundylyqtar. Búginde olardyń qorǵalýy men damýy aýdıtorııa úshin, kórermenniń nazary men senimi úshin jahandyq básekelestikke aýysty. Men qazirgi álemde shynaıy táýelsizdik pen egemendik – ulttyń básekege qabiletti medıakontent jasaı alýyn bildiredi dep esepteımin», - dedi Darıǵa Nazarbaeva XVII Eýrazııalyq medıa forýmnyń ashylýynda.

D. Nazarbaeva bul máseleniń Qazaqstan úshin de syn-qater bolyp otyrǵanyn aıtty.

«Ótken eki jylda adamzat buryn-sońdy bolmaǵan synaqtarǵa tap boldy. Koronavırýs pandemııasy jáne onymen baılanysty ekonomıkalyq-áleýmettik kataklızmder álemdi tanymastaı ózgertip jiberdi, barlyq zamanaýı qoǵamdardyń, barlyq áleýmettik qorǵaý jáne densaýlyq saqtaý júıeleriniń tereń problemalary aıqyn kórindi. Halyqaralyq deńgeıde memleketaralyq qatynastardyń tutas júıesiniń beriktigi synalyp keledi, negizgi syn-qater faktory – senimniń joǵalýy boldy», - dep atap ótti spıker.

Darıǵa Nazarbaevanyń aıtýynsha, memleketaralyq, halyqaralyq dıalog pen senim tetikteriniń álsireý protsesi buryn bastalǵan, biraq pandemııa bul protsesti jedeldetip, oǵan túbegeıli jańa ólshem berdi.

«Bul - árıne, óte alańdatarlyq úrdis. Kez kelgen senim áńgimeden, ózara syılastyqtan bastalady. Qazir álem dıalogtyń jańa formattary men jańa formalaryn izdeı bastaǵanyn kórip otyrmyz. Biz Eýrazııalyq medıa forýmnyń bul protseske óz úlesin qosatynyna qýanyshtymyz. Birneshe jyl buryn Elbasy Nursultan Nazarbaev: «Taptaýryndarǵa qaramastan Batys pen Shyǵys Qazaqstan jerinde, álemdik jáne dástúrli dinder kóshbasshylarynyń sezderinde jáne basqa da alańdarda keń dıalog ornatý úshin turaqty túrde birigedi» degen edi. Bizde aıtylatyn, talqylanatyn nárse kóp, aıyrmashylyqtardy emes, konstrýktıvti ózara árekettesý úshin onyń aldyn alý joldaryn izdeý kerek. Bizdiń forýmnyń urany «2021: álem jańa qundylyqtar izdeıdi» dep atalýy tegin emes. Eýrazııalyq medıa forým búkil álemniń qoǵamdyq pikir kóshbasshylaryna táýelsiz Qazaqstandy kórýge jáne bilýge, bizdiń elimizdi súıýge múmkindik berdi», - dedi Darıǵa Nazarbaeva.

Aıta keteıik, búgin Nur-Sultanda XVII Eýrazııa medıa forýmynyń jumysy resmı túrde ashyldy. Forým 17 qyrkúıekke deıin jalǵasady.


Avtor Aıjan Serikjanqyzy
Basty sózder: BAQ, Qoǵam,
Joǵary qaraı