Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Álemdegi koronavırýs: Ulybrıtanııada jańa shtamm, Rýmynııadaǵy aýrýhanalar lyq toly

2021 jyldyń 20 qazan 2021 14:18

NUR-SULTAN. QazAqparat – Ulybrıtanııa men Irlandııada Covid-19 órship tur. Italııada kún saıyn kovıd-sertıfıkat engizýge qarsylyq tanytýshylar sherýge shyǵyp jatyr, al Rýmynııadaǵy aýrýhanalar COVID-19 aýyr túrine shaldyqqan naýqastarǵa tolyp tur. Bul týraly QazAqparat Euronews-ke silteme jasap habarlaıdy.

Ulybrıtanııada Covid-19 órship ketti. Sońǵy aptada kórsetkish 16%-ǵa ósken. Sarapshylar bul jaǵdaıdy koronavırýs jańa shtamynyń taralýymen baılanystyrdy. AY.4.2 túri shilde aıynda anyqtaldy, al qazir ınfektsııamen túsken barlyq naýqastyń 6%-y osy shtamǵa tıesili. Bir táýlik ishinde 223 naýqas qaıtys boldy, bul naýryz aıynan beri tirkelgen joǵarǵy kórsetkish.

Sonymen birge, Ulybrıtanııa bıligi jańa sanıtarlyq shekteý engizýdi áli josparlap otyrǵan joq.

Italııada kún saıyn kovıd sertıfıkattardy engizýge qarsylyq tanytýshylar sherýi ótip jatyr. Trıesta portynda polıtsııa eldiń túkpir-túkpirinen kelgen narazylyq bildirýshilerdi taratý úshin sý shashatyn qurylǵy qoldandy. Aktsııaǵa qatysýshylar tórt kún boıy port qaqpasyn jaýyp tastady.

Irlandııada uzaq ýaqyt shekteýlerden keıin túngi klýbtar ashyla bastady, biraq el bıligi aýrýhanalardyń lyq tolýy men aýrýǵa shaldyqqandar sanynyń ósýine baılanysty kóptegen sanıtarlyq sharalardy alyp tastaý josparyn qaıta qarady.

Rýmynııa aýrýhanalarynda COVID-19 aýyr túrine shaldyqqan naýqastarǵa oryn jetispeı jatyr. Bılik mobıldi gospıtalder uıymdastyryp jatyr, biraq olar da naýqastardy qabyldap úlgermeı jatyr, dep jazady Euronews .

Elde 1 750 adam jansaqtaý bóliminde jatyr. Keıbir naýqastar birneshe kún boıy jedel járdem kóliginde ókpeni jasandy jeldetý apparatyna qosylǵan. Keıbireýleri aýrýhanaǵa kirmesten qaıtys bolýda. Onyń sebebi - vaktsınatsııanyń tómendigi. Rýmynııa Eýroodaqtaǵy vaktsına alý qarqyny eń tómen memleket. 19 mıllıonnan astam halqy bar elde turǵyndardyń 35,2%-y ekpeniń kem degende bir dozasyn alǵan, 29,4%-y tolyǵymen egilgen.


Basty sózder: Álem, Álemdegi koronavırýs,
Joǵary qaraı