Aýa raıy
Astana -6 °S
Almaty 1 °S
valıýta baǵamy
USD 421.58
EUR 496.83
RUB 5.53
CNY 62.20

Alık Shpekbaev: Sapaly memlekettik qyzmet – turmystyq jemqorlyqty joıýdyń kepili

2020 jyldyń 29 qazan 2020 21:06

PAVLODAR. QazAqparat - 29 qazanda sybaılas jemqorlyqtyń alǵysharttaryn joıýǵa baǵyttalǵan «Halyq únine qulaq asatyn memleket» tujyrymdamasyn iske asyrý aıasynda Sybaılas jemqorlyqqa qarsy is-qımyl agenttiginiń tóraǵasy Alık Shpekbaev Pavlodar oblysyna eki kúndik jumys saparymen keldi.

Agenttik tóraǵasynyń jumys sapary Ekibastuz qalasynan bastaldy. Onda ol «Pavlodar oblysy boıynsha Azamattarǵa arnalǵan úkimet» MK KEAQ fılıalynyń bólimderine, qalalyq servıstik ákimdikke, sondaı-aq Memlekettik kirister basqarmasyna bardy.

Oblys ákimi Á. Sqaqovpen birge Qalqaman kentiniń «Ashyq ákimdik» front-keńsesine bardy. Bul mekeme áleýmettik máseleler boıynsha 8 memlekettik qyzmet kórsetetin Pavlodar oblysyndaǵy alǵashqy aýyldyq front-keńse. Tájirıbe kórsetip otyrǵandaı, bul front-keńseler azamattarǵa qolaıly jaǵdaıda memlekettik qyzmetterdi jedel jáne sapaly kórsetýge múmkindik beredi. Osyǵan oraı, oblystyń myńnan astam turǵyny bar eldi-mekenderinde osyndaı ortalyqtar ashý josparlanyp otyr.




Odan ári agenttik tóraǵasy Aqsý qalasy ákimdiginiń «Open Aksu» jumys barysymen tanysty. Aıta ketý kerek, atalǵan ortalyqta 83 memlekettik qyzmet kórsetiledi, onyń 93,8%-y elektrondy túrde. Bıylǵy jyldyń basynan bastap ákimdikke memlekettik qyzmetter boıynsha keńes alýǵa 3 myńnan astam azamat júgindi.




A. Shpekbaev Ekibastuz, Aqsý qalalarynda jáne Qalqaman kentinde bolyp, tutynýshyǵa baǵdarlaný, ashyqtyq jáne ashyqtyq qaǵıdattaryna negizdelgen memlekettik mekemelerdi transformatsııalaý boıynsha júrgizilip jatqan jumysqa oń baǵasyn berdi.




«Men barlyq jerde standarttyń birdeı ekenine jáne azamattarǵa jaǵdaı jasalǵanyna kóz jetkizdim. Sapaly memlekettik qyzmetter – turmystyq jemqorlyqty joıýdyń kepili. Olardy alý úshin qolaıly jaǵdaı jasaý – memlekettik apparatqa degen senimdi arttyrý turǵysynan birinshi kezektegi mindet», – dep atap ótti Sybaılas jemqorlyqqa qarsy qyzmet basshysy.

Jumys saparynyń ekinshi kúni Agenttik tóraǵasy tsıfrlandyrýdy belsendi engizip jatqan birqatar áleýmettik jáne bilim berý uıymdaryna barady. Sondaı-aq, ol oblys ákimi Á. Sqaqovpen birge azamattardy qabyldaıdy.


Joǵary qaraı