Aýa raıy
Astana 31 °S
Almaty 34 °S
valıýta baǵamy
USD 412.55
EUR 468.66
RUB 5.79
CNY 58.80

Almaty dárihanalaryna 3 mln áleýmettik mańyzy bar dári jetkiziledi

2020 jyldyń 9 shilde 2020 19:09

ALMATY. QazAqparat - Almaty ákimdiginiń dári-dármekpen qamtamasyz etý jónindegi úılestirýshisi Zańǵar Sálimbaev shildeniń sońyna deıin megapolıske úsh mıllıonnan astam ómirlik mańyzdy dári-dármek jetkiziletinin aıtty, dep habarlaıdy QazAqparat tilshisi.

Onyń aıtýynsha, shamadan tys suranys dári tapshylyǵyna ákelgen. Máselen, eger byltyr Almatydaǵy farmatsevter ótken aıda shamamen 50 myń «Paratsetamol» satsa, bıyl 260 myń qyzýdy túsiretin dári satyldy. Máseleni sheshý úshin Almaty qalasynyń ákimi Baqytjan Saǵyntaevtyń tapsyrmasymen óndirýshilermen, jetkizýshilermen, dárihanalar jelisimen jáne mamandandyrylǵan qaýymdastyqpen memorandýmǵa qol qoıyldy.

«22 maýsymnan bastap biz iri jetkizýshilermen, otandyq óndirýshilermen, dıstrıbıýtorlarmen, dárihanalar jelisimen jáne farmatsevtıkalyq kompanııalarmen belsendi jumys jasaýdamyz. Olar kelisimge qol qoıdy, onda iri jetkizýshiler, resmı dıstrıbıýtorlar Almaty qalasyndaǵy 105 dárihanaǵa áleýmettik mańyzy bar dári-dármekterdiń basym bóligin jetkizetin bolady», - dep túsindirdi Zańǵar Sálimbaev.

Jaǵdaı Almaty ákiminiń baqylaýyna alyndy. Farmatsevtıka naryǵynyń qatysýshylary dári-dármekter qory týraly jáne ákimdik sheshýge kómektesip jatqan qıyndyqtar týraly jedel túrde habarlap otyr. Atap aıtqanda, ákimshilik kedergiler joıylyp, bizdiń naryqqa buryn kirmegen ımporttalǵan dárilerdi jedel sertıfıkattaý qolǵa alynbaq.

Zańǵar Sálimbaevtyń aıtýynsha, 1 shildeden bastap qalalyq dárihanalarǵa 475 myń mańyzdy dári-dármek alyndy. Onyń ishinde paratsetamol, aspırın, ıngavırın, azıtromıtsın jáne kardıomagnıl bar.

«Shilde aıynyń sońyna deıin megapolıske úsh mıllıonnan astam dári-dármek jetkiziledi. Onyń ishinde 2,2 mıllıon tabletka paratsetamol, 391 myń aspırın, 160 myń ıbýprofen, 60 myń ıngavırın, 99 myń azıtromıtsın jáne basqa da áleýmettik mańyzy bar dáriler. Úsh reıs jetkiziledi. Erteń ushaq Reseıden, 12 jáne 15 shildede Úndistannan keledi», - dep tolyqtyrdy Z. Sálimbaev. Osylaısha, dári-dármek naryǵyndaǵy jaǵdaı tolyǵymen turaqtandyrylady.


Joǵary qaraı