Aýa raıy
Astana 6 °S
Almaty 11 °S
valıýta baǵamy
USD 421.58
EUR 496.83
RUB 5.53
CNY 62.20

Almaty emhanalary koronavırýstyń jańa tolqynyna daıyndyqty bastady

2020 jyldyń 28 qyrkúıek 2020 16:50

ALMATY. QazAqparat – Almaty qalasy №18 emhanasynyń bas dárigeri Maııa Bolshanova onlaın brıfıng barysynda medıtsınalyq mekemeniń koronavırýs ınfektsııasynyń yqtımal jańa tolqynyna daıyndyǵy týraly aıtty, dep habarlaıdy QazAqparat tilshisi.

«Pandemııa kezindegi negizgi mindet – medıtsınalyq kómektiń qoljetimdiligi men sapasyn qamtamasyz etý jáne alǵashqy medıtsınalyq-sanıtarlyq kómek qyzmetkerleriniń qaýipsizdigin saqtaý» , - dedi Maııa Bolshanova.

Onyń aıtýynsha, alǵashqy medıtsınalyq sanıtarııalyq kómek uıymdarynda «taza» jáne «las» aımaqtar qalyptastyrylǵan.

«Epıdemııaǵa qarsy rejımdi saqtaý boıynsha baqylaý kúsheıtildi. Kireberisterde kúndelikti ınfektsııalyq baqylaý júrgiziletin sanıtarııalyq beketter qoıyldy. Juqtyrý qaýpiniń dárejesine sáıkes, jeke qorǵaný quraldarymen qamtamasyz etildi. Infektsııalyq aýrýlary bar, onyń ishinde COVID-19-ǵa kúdikti patsıentterge medıtsınalyq kómek tek fıltr aımaǵynda kórsetiledi jáne úıde bolsa onda mobıldi brıgada barady»,– dedi Maııa Bolshanova.

Sonymen qatar, ol sozylmaly aýrýlary bar patsıentterdi qashyqtan baqylaıtynyn aıtty.

«Fıltr aımaǵynda juqpaly aýrýy bar jáne COVID-19-ǵa kúdikti patsıentterdi qabyldaý kezinde aýrýdyń dárejesi anyqtalady. PTR testke jaǵyndy alynady, aýrý jeńil túrde bolsa emdeý taǵaıyndalady jáne patsıent ambýlatorııalyq baqylaýda bolady. Mobıldi brıgadaǵa jáne ýchaskelik dárigerge beriledi, ortasha ne aýyr túrimen aýyrǵan patsıent oqshaýlaǵyshqa ornalastyrylady jáne jedel medıtsınalyq járdem brıgadasy profıldi statsıonarǵa jetkiziledi», - dep atap ótti bas dáriger.

Emhana janynan quramynda dáriger, medbıke, psıholog,áleýmettik qyzmetkeri bar 6 mobıldi brıgada quryldy. Sondaı-aq, qajetti dári-dármek qory daıyndaldy.

«Turǵyndardan maska rejımin, áleýmettik qashyqtyqty, aldyn alý sharalaryn, vaktsınalyq profılaktıkany saqtaýdy suraımyn. Qazir emhanalarda tumaýǵa qarsy tegin vaktsına júrgizilýde, bul egde jastaǵy patsıentter, balalar, júkti áıelder úshin tumaý vırýsynan saqtaný sharalarynyń biri», - dedi spıker.

Sóz sońynda, dáriger aýrý belgileri anyqtalǵan jaǵdaıda medıtsınalyq mekemelerge júginý qajet ekenin aıtty.


Avtor Alma Muqanova
Basty sózder: Almaty, Medıtsına, Koronavırýs,
Joǵary qaraı