Aýa raıy
Astana -10 °S
Almaty 0 °S
valıýta baǵamy
USD 421.58
EUR 496.83
RUB 5.53
CNY 62.20

Almaty mańyndaǵy taýda adasyp ketken týrıst tabyldy

2020 jyldyń 17 qazan 2020 22:15

ALMATY. QazAqparat– Respýblıkalyq jedel-qutqarý jasaǵy Almaty mańyndaǵy taýda adasyp ketken adamdy qutqardy, dep habarlaıdy QazAqparat tilshisi.

Almaty oblysynyń Qarasaı aýdanynda taýda adasyp ketken er adam týraly aqparat respýblıkalyq jedel – qutqarý jasaǵynyń kezekshi bólimine 16 qazan kúni túnde kelip tústi.

«Qońyraý shalǵan boıjetken óziniń dosymen taýda túneýge shyqqanyn aıtty. Teńiz deńgeıinen 3 200 metr bıiktikke ornalasqan Terra alańynda jastar shatyr qurǵan. Qyz uıyqtaýǵa jatqanda, jas jigit temeki shegýge syrtqa shyǵyp ketken. Eki saǵattan keıin oıanǵan týrıst dosynyń qaıtyp oralmaǵanyn kórgen. Ol uıaly telefonyn shatyrǵa tastap ketken eken» - dep habarlady RJQJ.

8 qutqarýshy ıisshil ıtti ertip jigitti izdestirýge kiristi. Olar Ǵarysh stansasyna deıin kólikpen jetip, ary qaraı jaıaý kóterildi.

«Qutqarýshylar taýdaǵy shatyrdy tez taýyp aldy. Onda qyz jalǵyz otyr eken. Qutqarýshylar týrıstke eshqaıda shyqpaýǵa keńes berip, ózderi jan-jaqqa bólinip jigitti izdeýge kiristti. Qutqarýshylar joǵalǵan týrısti atymen atap aıqalap shaqyryp, jaryq túsirip belgi berdi. Adasyp qalǵan er adam qutqarý tobynyń daýsyn estip, solarǵa qaraı bet aldy»,– dep tolyqtyrdy vedomstvadan.

Belgili bolǵandaı, er adam shatyrdan uzap ketip, qaıtar joldy shatastyryp alǵan. Ol tómen túsip ketken. Týrıstiń qolynda jaryq túsiretin sham bolmaǵandyqtan, ol shyrshanyń túbine túnemek bolǵan.

«Qazir taýdyń keıbir jerine qar tústi. Túnde aýa temperatýrasy nólden tómen bolýy múmkin. Joǵalǵan týrıstke kómek der kezinde kórsetilgendi, ol tońbaǵan, jaǵdaıy birqalypty boldy», - dep atap ótti respýblıkalyq jedel-qutqarý jasaǵynyń ókili.

Qutqarýshylar jastardy qalaǵa jetkizip salý úshin kólikke otyrǵyzyp jiberdi.


Avtor Alma Muqanova
Basty sózder: Almaty oblysy, Oqıǵa,
Joǵary qaraı