Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Almaty-Óskemen tas jolynda kólik apatynan er adam qaza tapty

2022 jyldyń 20 qańtar 2022 10:51

TALDYQORǴAN. QazAqparat- Almaty-Óskemen tas jolynda kólik apatynan 61 jastaǵy adam mert boldy. Taǵy tórt adam zardap shekti, dep habarlaıdy QazAqparat tilshisi.

Osy keleńsiz jaıtqa baılanysty Kerbulaq aýdandyq Polıtsııa basqarmasynyń bastyǵy jol qaýipsizdigin qatań saqtaýdy jáne jolda muqııat bolý qajettiligin eskertti.

2022 jylǵy 18 qańtarda «Almaty-Óskemen» respýblıkalyq mańyzy bar avtojoldyń 174-shaqyrymynda «Toyota Land Cruiser PRADO» avtokóligin basqarǵan boıjetken rýlge ıe bola almaı, jol kólik oqıǵasyna jol bergeni anyqtaldy. Jol talǵamaıtyn kólik aýdarylyp, salonyndaǵy birneshe adam jaraqattanyp, bir adam kóz jumǵan.

«Atalǵan derek boıynsha QR Qylmystyq kodeksiniń 345-babyna sáıkes sotqa deıingi tergeý amaldary júrgizilip jatyr. Іs boıynsha tıisti birqatar saraptamalar taǵaıyndaldy. Kólik apaty kezinde 1960 jyly týǵan jolaýshy kóz jumyp, 1985 jyly týǵan júrgizýshi áıel men 3 jolaýshy ártúrli dene jaraqattarymen aýrýhanaǵa jetkizildi»,- dedi Kerbulaq APB bastyǵy, polıtsııa podpolkovnıgi Erbol Ahmetqalıev.

Polıtsııa taratqan aqparat boıynsha, jol kólik oqıǵasyn jasaǵan kólik arnaıy turaqqa qoıylǵan. Taǵaıyndalǵan saraptamalardyń qorytyndylary negizinde jol apatynyń ne sebepten oryn alǵanyn tolyq anyqtaıtyn sotqa deıingi tergeý amaldary aıaqtalǵan soń, is materıaldary sot organdarynyń qaraýyna joldanady.

«Osy jaǵdaıdy eskere otyryp, barlyq júrgizýshilerdi jolda abaı bolýǵa, qaýipsizdik sharalaryn qatań saqtaýǵa shaqyramyn. Joldaǵy bolmashy qatelik ózińizdiń ne ózgeniń ómirine úlken qaýip tóndiretinin esten shyǵarmaǵan abzal. Joǵary jyldamdyq, qaýipti manevrler jasaý, muqııatsyzdyq nemese aýa-raıy jaǵdaıyn esepke almaı jolǵa shyǵý jol apattarynyń basty sebepteri bolyp otyr»,- dep tolyqtyrdy Erbol Ahmetqalıev.


Avtor Samal Qabysheva
Basty sózder: Almaty oblysy, Oqıǵa, Kólik, QR ІІM,
Joǵary qaraı