Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Almaty jedel járdem qyzmeti jumysshylardyń jemqorlyq týraly shaǵymyna jaýap berdi

2021 jyldyń 13 qyrkúıek 2021 12:34

ALMATY. QazAqparat – Almatydaǵy jedel járdem qyzmetkerleri basshylyqtyń sybaılas jemqorlyqqa qatysy baryn jáne jumyskerlerge kórsetken qysymyn aıtyp shaǵymdandy, dep habarlaıdy QazAqparat tilshisi.

Aıta keteıik, birqatar buqaralyq aqparat quraldarynda jedel járdem stantsııasynda isteıtin 75 júrgizýshi qol qoıǵan shaǵym týraly aqparat tarady.

Onda jumysqa ornalasý úshin júrgizýshiler bastyǵyna belgili bir somany tóleýi kerektigi aıtylǵan.

Sonymen qatar, júrgizýshilerge arnaıy kıim berilmeıtini, buzylǵan kólikterdi óz qarajaty esebinen jóndeıtini jáne jańa basshy kelgeli beri koronavırýspen aýyratyn naýqastarmen jumys isteý qaýpi boıynsha ústemaqynyń aıtarlyqtaı tómendegeni týraly da jazylǵan.

Jedel járdem qyzmeti taraǵan aqparatqa qatysty túsinik berdi. Olardyń aıtýynsha, jedel járdem qyzmetkerleri bul shaǵymdy 2 qyrkúıek kúni jazǵan.

Shaǵymda keltirilgen derekterdi Nur Otan partııasy, Almaty ákimdigi, qalalyq qoǵamdyq densaýlyq saqtaý basqarmasymen birlesip tekserdi.

Jedel járdem qyzmetinde júrgizilgen tekserý nátıjesi boıynsha júrgizýshilerdiń shaǵymy negizsiz dep tabyldy.

«Ótinishte aıtylǵandar búkil qyzmetkerlerdiń pikiri emes, tek 12-shi qosalqy stantsııanyń keıbir júrgizýshileriniń narazylyǵy ekenin aıtyp ótken jón. Bul narazylyq basshylyq tarapynan janar-jaǵarmaı úshin júrgizýshilerdiń shyǵynyn baqylaýdyń kúsheıýine baılanysty shyqty. Bul tekseris bıýdjet qarajatyn aı saıyn 8 361 660 teńgege únemdeýge kómektesedi. Sondaı-aq jedel járdem júrgizýshileriniń qatysýymen jol-kólik oqıǵalarynyń aldyn alýǵa alyp keldi», - dep habarlady jedel járdem qyzmeti.

Vedomstvo jedel járdem júrgizýshileriniń qatysýymen 39 jol apaty bolǵanyn, onyń 19-y júrgizýshilerdiń kinásinen ekenin, ekeýi ólimmen aıaqtalǵanyn, jeteýi jaraqat alǵanyn, onyń úsheýi dáriger men bir jedel járdem júrgizýshisi ekenin atap ótti.


Joǵary qaraı