Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Almatyda Ábish Kekilbaevtyń povesimen túsirilgen «Shyńyraý» fılmi tanystyryldy

2021 jyldyń 20 jeltoqsan 2021 20:08

ALMATY. QazAqparat – Almatyda jazýshy Ábish Kekilbaevtyń «Shyńyraý» povesi negizinde túsirilgen attas fılmniń resmı tanystyrylymy ótti, dep habarlaıdy QazAqparat tilshisi.

«Fılm 10-nan astam halyqaralyq kınofestıvaldiń konkýrstyq baǵdarlamasyna qatysyp baǵasyn alǵanmen, eldegi premerasy pandemııaǵa baılanysty keıinge shegerilgen edi. Sonyń reti búgin kelip otyr. Sharaǵa qarjylaı demeýshilik kórsetken «Qazaqstan Kommertsııa» aktsıonerlik qoǵamy dırektorlar keńesiniń tóraǵasy, belgili metsenat, memleket jáne qoǵam qaıratkeri Jaýǵashty Jolanuly Nabıevke alǵys aıtamyz», - deıdi jazýshynyń nemeresi Abyl Kekilbaev.

Fılmniń stsenarıin rejısser Jańabek Jetirýovtyń ózi jazǵanyn aıta ketý kerek.

Negizi povest 1982 jyly jaryq kórgen. Sol tustan 2009 jylǵa deıin birneshe kıno mamany ony ekranǵa shyǵarýǵa nıettengenimen, sáti túspegen kórinedi.

«2009 jyly «Qazaqfılm» kınostýdııasynyń sol kezdegi prezıdenti Ermek Amanshaevtyń uıytqy bolýymen Ábish atamnyń povesin ekranǵa shyǵarý boıynsha naqty jumys bastaldy. Bul jumys Jańabek Jetirýovqa tapsyryldy. Ol kisi povest avtorymen birneshe ret kezdesip, stsenarıdiń alǵashqy nusqasyn ózine maquldatqan bolatyn. Ókinishke qaraı, atamyz fılmdi túsirý jumystary bastalǵanyn kórmeı ketti. 2019 jyly Astanada «Eýrazııa» Halyqaralyq kınofestıvaliniń baǵdarlamasynda «Shyńyraý» fılmi alǵash ret kórsetildi», - deıdi Ábish Kekilbaevtyń nemeresi.

Fılmdegi sıýjet jelisi Ústirt jazyǵynda qudyq qazýdy kásip etken eki qarapaıym qudyqshynyń arasyndaǵy básekege qurylǵan.




Eldiń batasyn alýdy maqsat tutqan baıyrǵy kásipti básekeniń kózine aınaldyrǵan Eńsep aqyry sol baqtalastyqtyń qurbanyna aınalady.

«Fılm adamnyń óz maqsatyna jetý úshin ómir baqı eńbektenetinin, biraq ol óz múmkindiginiń qaı jerde sarqylatynyn sezbeı, shekten asyp ketip, óz armanynyń qurbanyna aınalatynyn kórsetedi», -deıdi Abyl Kekilbaev.

Bul fılm 2019 jyldan beri 10-nan astam halyqaralyq fetıvalge qatysqan.

Sonyń eń negizgileri - 2019 jyly Iranda ótken 37-shi «Fadjr» halyqaralyq kınofestıvaliniń, Qytaıdyń Sıamen qalasynda ótken «Altyn átesh jáne júz gúl» halyqaralyq kınofestıvaliniń, Úndi elinde ótken 24-shi «Kerala» halyqaralyq kınofestıvaliniń Bolgarııanyń Sofııa qalasynda ótken 13-shi «MENAR» halyqaralyq kınofestıvaliniń jáne Sankt-Peterbýrgte ótken 27-shi «Ádebıet jáne kıno» atty halyqaralyq kınofestıvaldiń negizgi konkýrstyq baǵdarlamasynda usynyldy.

Sondaı-aq, AQSh-tyń Arızona qalasynda uıymdastyrylǵan Azııalyq fılmderdiń halyqaralyq kınofestıvalinde, Úndi memleketiniń birneshe qalalarynda kórsetilgen.

Týyndynyń akterlik quramyna kelsek, negizgi rólderdi Qazaqstannyń eńbek sińirgen qaıratkeri Aldabek Shalbaev, belgili teatr jáne kıno akteri Muhamedjan Myrzakeev, «Daryn» jastar syılyǵynyń ıegeri Asylhan Tólepov, Maqsat Sábıtov, Qanat Qurymbaev, Aıjan Jańabekqyzy, Anar Beısenbına sııaqty ártister somdaǵan.














Avtor Esimjan Naqtybaı
Basty sózder: Almaty, Ádebıet, Óner, Mádenıet,
Joǵary qaraı