Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Almatyda azyq-túlik tapshylyǵy joq

2022 jyldyń 17 qańtar 2022 17:05

ALMATY. QazAqparat - Almatyda azyq-túlik tapshylyǵy joq. Bul týraly qalalyq Kásipkerlik jáne ınvestıtsııalar basqarmasynyń basshysy Erkebulan Orazalın Almatynyń tynys-tirshiligin qalpyna keltirý jónindegi qalalyq shtab otyrysy barysynda aıtty, dep habarlaıdy QazAqparat tilshisi.

Onyń aıtýynsha, búginde Almatynyń barlyq azyq-túlik kásiporyndarynyń qyzmeti qalpyna keltirildi, ónimderdi jetkizý barlyq iri jáne orta sýpermarketterge, úı janyndaǵy dúkenderge, sondaı-aq bazarlarǵa shtattyq rejımde júrgizilýde.

Qalada 144 iri jáne orta sýpermarket, 3,5 myńnan astam úı janyndaǵy dúken, 26 azyq-túlik bazary jumys isteıdi.

Jalpy, qalalyq jáne óńirlik óndirýshilerden azyq-túlik ónimderin jetkizý jáne satý retke keltirildi, birinshi kezekte qajetti ónim tapshylyǵy baıqalmaıdy.

Áleýmettik nan qajettiligin qalanyń nan pisirý kásiporyndary – «Aqsaı nan» NTK» JShS, «Bashırov» JK, «Rýzı Nan» JShS, «Almatynan HBK» JShS jáne «DarıNan» JShS tolyq qamtamasyz etedi.

Sút ónimderiniń jalpy qalalyq qajettiliginiń 20,5% «Agroprodýkt» kompanııalar toby men «Maslodel» JShS jabady. Qalǵan 79,5% Almaty oblysynyń óndirýshileri jetkizedi.

«Qalanyń kúnbaǵys maıyna degen qajettiliginiń jartysyn jergilikti maı zaýyttary – «Evrazıan Fýds Korporeıshn» AQ, «Maslodel» JShS jáne «EFKO Almaty» JShS qamtamasyz etedi. Sondaı-aq Reseı óndirýshileriniń ónimderi bar (5%). Kókónister Almatyǵa Pavlodar, Almaty, Jambyl jáne Qaraǵandy oblystarynan ákelinedi. Et ónimderi men jumyrtqa Almaty, Túrkistan, Jambyl oblystarynan kelip jatyr», - deıdi basqarma basshysy.

Bakaleıa ónimderin (un, jarma, qant, tuz jáne t.b.) negizgi jetkizý Qostanaı, Almaty, Jambyl, Aqmola, Pavlodar, Qyzylorda jáne Shyǵys Qazaqstan oblystarynan júrgiziledi.


Joǵary qaraı