Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Almatyda bıznesti jeńildikpen nesıeleý baǵdarlamasy bastaldy

2021 jyldyń 22 sáýir 2021 14:11

ALMATY. QazAqparat - Almaty aýdandarynda bıznesti jeńildikpen nesıeleý baǵdarlamasy bastaldy, dep habarlaıdy QazAqparat tilshisi.

Almatynyń Naýryzbaı, Alataý, Túrksib jáne Jetisý aýdandarynyń turǵyndary bıznes júrgizý úshin jylyna 5% mólsherlememen nesıe ala alady.

Almaty qalasynyń ákimi Baqytjan Saǵyntaevtyń tapsyrmasy boıynsha «Almaty Business» óńirlik baǵdarlamasyna tıisti túzetýler engizildi. Buǵan deıin, Almatynyń kásipkerlerine joǵaryda atalǵan baǵdarlama aıasynda jylyna 7% paıyzdyq mólsherlememen jeńildetilgen nesıe berilgen.

«Almaty bıznesiniń basym bóligi saýda jáne qyzmet kórsetý salasynan turady. Osyǵan baılanysty, Almaty ákimdigi men «Damý» qory saýda, sulýlyq salondary, monsha keshenderi, hostelder jáne basqa da salalarda jumys isteıtin kásipkerlerdi qoldaý baǵdarlamasyna bastama jasady. Júrgizilgen taldaýǵa sáıkes shaǵyn jáne orta bıznes sýbektileri qala aýdandarynda birkelki shoǵyrlanbaǵan. Olardyń sany boıynsha Bostandyq, Almaly, Medeý aýdandary kósh bastap tur jáne olardyń úlesi 50%-dan asady. «Damý» qorymen kelissózder júrgizý arqyly ákimdik belsendiligi tómen aýdandardyń turǵyndary úshin paıyzdyq mólsherlemeni 7%-dan 5%-ǵa deıin tómendetti», – dep habarlady Almaty qalasy ákiminiń orynbasary Maqsat Qıqymov.

Baǵdarlamaǵa Almaty qalasynda tirkelgen jáne qyzmetin júzege asyratyn shaǵyn jáne orta kásipkerlik sýbektileri qatysa alady. Bir qaryz alýshyǵa beriletin qaryzdyń eń joǵary somasy 180 mln teńge. Syıaqynyń nomınaldy mólsherlemesi – belsendiligi tómen aýdandar úshin 5%, belsendi aýdandar úshin 7%.

Óńirlik baǵdarlama aıasynda 2021 jyly tepe-teń negizde 11,2 mlrd teńge qarastyrylǵan (aýyspaly jáne revolverlik qarajat). Búgingi tańda jalpy nesıe somasy 1 346,4 mln teńgeni quraıtyn 21 jobaǵa qoldaý kórsetildi.


Joǵary qaraı