Aýa raıy
Astana 24 °S
Almaty 30 °S
valıýta baǵamy
USD 412.55
EUR 468.66
RUB 5.79
CNY 58.80

Almatyda BRT qurylysynyń birinshi kezeńi qyrkúıekte aıaqtalady

2020 jyldyń 9 shilde 2020 19:17

ALMATY. QazAqparat - Almatyda BRT qurylysynyń birinshi kezeńi bıyl qyrkúıekte aıaqtalady. Bul týraly onlaın brıfıng barysynda Qalalyq mobıldilik basqarmasy basshysynyń orynbasary Ernur Abjahan aıtty, dep habarlaıdy QazAqparat tilshisi.

«Bıyl qyrkúıekke deıin birinshi kezeń boıynsha jumys aıaqtalady. Bizde Jandosov kóshesinde 1 shaqyrym jol boıynda turǵan nysandardy satyp alyp jatyrmyz. Sońǵy úı tárkilenip alyndy. Qazir bul úıler kúrelip jatyr. Qyrkúıektiń sońyna deıin jol jumystary aıaqtalyp paıdalanýǵa beriledi», - dedi ol.

Onyń aıtýynsha, qazir BRT ekinshi kezeńine daıyndyq júrip jatyr.

«Qazir tehnıkalyq sharttardy kommýnaldyq qyzmet ókilderimen kelisip jatyrmyz. Odan keıin jobaǵa memlekettik saraptama júrgiziledi», - dedi ol.

Almatyda BRT (júrdek avtobýs jelisiniń) ekinshi kezeńi qashan bastalatynyn qoǵamdyq keńes tyńdaýynda Ernur Abjahan aıtqan bolatyn.

Jobanyń birinshi kezeńi - uzyndyǵy 8,7 shaqyrym bolatyn marshrýt ýchaskesi «Mustafın - Súleımenova- Jandosov – Tımırıazev» kóshelerimen Jeltoqsan kóshesine deıin barady.

«BRT qurylysy qarajat bólingen jaǵdaıda 2021 jyldan bastalady. Saraptama qorytyndysy shyqqan soń respýblıkalyq bıýdjetke saýal jiberýimiz de múmkin. Keler jyly bastasaq, qurylys jumystaryna shamamen 22 aı ketedi. Qurylys jumystary 1,5-2 jylǵa sozylady», - dedi qalalyq Mobıldilik basqarmasy basshysynyń orynbasary Ernur Abjahan.

Joba quny shamamen 12 mlrd dollar dep baǵalanyp otyr. BRT jobasynyń ekinshi kezeńi, ıaǵnı 13 shaqyrymdyq ýchaskesi Jeltoqsan kóshesimen Tóle bı, Shyǵys aınalma joly, Halyk Arena tusyndaǵy depoǵa deıin barady.


Avtor Gúlmıra Ǵosmanálı
Basty sózder: Kólik, Jol, Almaty,
Joǵary qaraı