Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Almatyda býyn almastyrý operatsııasy medsaqtandyrý esebinen jasalyp jatyr

2021 jyldyń 7 qazan 2021 14:10

ALMATY. QazAqparat - Almatylyq dárigerler 90 jastaǵy naýqastyń jambas býynyn almastyrdy. Operatsııa mindetti áleýmettik medıtsınalyq saqtandyrý esebinen jasaldy, dep habarlaıdy QazAqparat tilshisi.

Almaty qalalyq №4 aýrýhananyń endoprotezdeý bólimi meńgerýshisi Manarbek Áýbákirovtiń aıtýynsha, zeınetker avtobýstan qulap jaraqat alǵan.

Dárigerler birden jambas súıeginiń jabyq sýbkapıtaldy synyǵy degen dıagnoz qoıypty.

«Aýrýhanaǵa túsken kezde patsıent jambasynyń isip ketkenin, qatty aýyratynyn aıtyp shaǵymdandy. Sonymen qatar qımyl-qozǵalysy qıyndap, júrip-turýdan qalǵan. Qabyldaý bóliminde ony keshendi tekserýden ótkizdik, terapevt, travmatolog, anestızıologtan quralǵan mýltıdıstsıplınarlyq komanda qarady», - dedi Manarbek Áýbákirov.

Jasy toqsandy alqymdaǵan Vera Kım otanyń bul túri jaıly jaqsy biledi. Sondyqtan ol operatsııa jasaýǵa birden kelisim bergen.

«Bazardan qaıtyp kele jatyp avtobýsqa mindim.Túserde aıaǵym taıyp ketip joldyń jıegindegi tasqa quladym. Sóıtsem jambas súıegim synǵan eken. Birden jedel járdem shaqyrtyp, olar meni 4-aýrýhanaǵa jetkizdi. Dárigerler qarap shyqqannan keıin ota jasaý qajettigin aıtty. Balalarym da birden kelisti. Operatsııa tez, jaqsy jasaldy. Sodan beri mine, bir apta ótti, qazir aıaǵymdy basyp júremin. Qartaıǵan shaǵymda osyndaı qýanysh syılaǵan dárigerlerge rızamyn», - deıdi zeınetker.

Býyn almastyrý jalpy quny 1,5 mln teńgeden bastalatyn joǵary tehnologııalyq operatsııalar qataryna jatady. Ota zeınetkerge MÁMS paketi sheńberinde tegin jasaldy.

Endoprotezdeý sońǵy jyldary kóp jasalyp júrgen manıpýlıatsııalardyń biri. Sebebi ol býyny aýyratyn syrqattyń aýrýyn jeńildetip, emin-erkin júrip-turýyna múmkindik beredi.

Medıtsınalyq saqtandyrý qorynyń Almaty qalalyq fılıaly dırektory Tileýhan Ábildaevtyń aıtýynsha, saqtandyrylǵan turǵyndar joǵary tehnologııalardyń kómegimen jasalatyn qyzmetterdi, KT, MRT syndy konsýltatıvtik-dıagnostıkalyq qyzmet túrlerin, reabılıtatsııalyq kómekti turaqty túrde paıdalanyp keledi.

«MÁMS paketiniń aýqymy keń. Saqtandyrylǵan azamattar kópshiliktiń qaltasy kótere bermeıtin osyndaı ota túrlerin jasatý qajet bolǵan jaǵdaıda medıtsınalyq qyzmetti kóp shyǵyndalmaı, kedergisiz paıdalana alady. Sondyqtan barsha azamattardy saqtandyrý júıesine qatysýǵa shaqyramyn», - dedi fılıal dırektory.


Joǵary qaraı