Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Almatyda eki jańa Oqýshylar saraıy salynyp jatyr

2022 jyldyń 24 qańtar 2022 17:25

ALMATY. QazAqparat - Almatynyń Alataý jáne Naýryzbaı aýdandarynda Oqýshylar saraılary salynyp jatyr. Bul týraly Almaty ákiminiń orynbasary Muhıt Ázirbaev onlaın brıfıng barysynda málim etti, dep haarlaıdy QazAqparat tilshisi.

Spıkerdiń sózinshe, Almatyda mektepten tys tegin bilim berýmen qamtý áli de tómen.

«Atalǵan máseleni sheshý úshin Alataý jáne Naýryzbaı aýdandarynda eki jańa Oqýshylar saraıynyń qurylysy bastaldy. Árqaısysynyń qýaty – 675 adam. Bul nysandar qosymsha bilim berý jáne balalardyń bos ýaqytyn ótkizý baǵdarlamalaryn júzege asyrý úshin qolaıly jaǵdaı jasaýǵa múmkindik beredi», - dedi ákimniń orynbasary.

Sonymen qatar, ol balabaqshalar men mekteptegi oryn tapshylyǵy máselesin sheshý jumystary belsendi júrip jatqanyn jetkizdi. Bıyl bıýdjet esebinen Naýryzbaı aýdanynyń «Qalqaman-2», Alataý aýdanynyń «Nurkent», «Mádenıet» jáne «Darhan», Túrksib aýdanynyń «Qaırat» shaǵyn aýdandarynda bes mekteptiń, sondaı-aq №9, 48, 191 úsh mektepke qosalqy ǵımarat salynady.

«Saıaly» jáne «Zerdeli» shaǵyn aýdandarynda barlyǵy 1100 oqýshyǵa arnalǵan eki mektep, sondaı-aq qalanyń alty mektebine qosalqy qurylys salý josparlanǵan - №59, 112, 148, 103, 65, 97.

«Mektepke deıingi bilim berý nysandary boıynsha Naýryzbaı, Alataý, Áýezov, Jetisý jáne Túrksib aýdandarynda toǵyz balabaqshanyń jobalyq-smetalyq qujattamasyn daıyndaý jumystary júrgizilýde. 5 jylǵa deıingi kezeńde mektepter men balabaqshalardaǵy tapshylyqty joıý josparlanýda», - dedi ákimniń orynbasary.

Sondaı-aq ol Alataý aýdanynda 14 kortqa arnalǵan tennıs ortalyǵynyń qurylysy aıaqtalyp qalǵanyn jetkizdi.

«Alataý aýdanynda 14 kortqa arnalǵan tennıs ortalyǵynyń qurylysy aıaqtalýda. Birinshi jartyjyldyqta Alataý, Medeý jáne Túrksib aýdandarynda úsh deneshynyqtyrý-saýyqtyrý kesheni iske qosylady. Olarǵa barý barlyq jas sanattary úshin, onyń ishinde múmkindigi shekteýli azamattar úshin qoljetimdi bolady. Deneshynyqtyrý-saýyqtyrý keshenderinde sanatyna qaraı ámbebap sport zaldary, basseınder, trenajer zaldary, kúshtik daıyndyq, boks jáne horeografııa zaldary, ústel tennısine arnalǵan zaldar jáne shahmat klýby bolady», - dedi spıker.

Aıta keteıik, Naýryzbaı, Áýezov, Almaly jáne Túrksib aýdandarynda taǵy jeti deneshynyqtyrý-saýyqtyrý kesheniniń jobasy ázirlenip jatyr. Olardyń qurylysy jyl sońynda bastalady.


Avtor Alma Muqanova
Basty sózder: Almaty, Qurylys, Bilim,
Joǵary qaraı