Almatyda qalyń qardyń kesirinen aǵashtar qulady
ALMATY. QazAqparat – Almatyda tolassyz jaýǵan qarly jańbyrdyń saldarynan aǵashtar qulady, dep habarlaıdy QazAqparat tilshisi.
Abaı men S.Seıfýllın kósheleriniń qıylysynda ornalasqan meteostantsııanyń habarlaýynsha, qalada 16 mm jaýyn-shashyn túsken, qar jamylǵysynyń bıiktigi 7 sm-ge jetti. Túnde jáne tańerteń joldarda kóktaıǵaq boldy.
Sekýndyna 2 metr jel soǵyp, aýa temperatýrasy Tselsıı kórsetkishi boıynsha 0,2 gradýs boldy.
Qalalyq TJD-nyń kezekshi nómirine butaqtar men aǵashtar qulaǵany týraly 8 qońyraý túsken. Almaty qalasy Qutqarý qyzmetiniń jedel kezekshisiniń aqparaty boıynsha, úsh jerde qulaǵan aǵash 4 avtokólikti basyp qalǵan. Tótenshe jaǵdaıdyń saldaryn joıýǵa Almaty qalasy Qutqarý qyzmetinen 5 arnaıy tehnıka men 17 adam jumyldyryldy. Oqys oqıǵadan adamdar japa shekken joq.
