Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Almatyda qansha jol ınfraqurylymy qalpyna keltiriledi

2022 jyldyń 17 qańtar 2022 13:40

ALMATY. QazAqparat - Almatyda búlingen jol ınfraqurylymyn qalpyna keltirý jumystary júrgizilip jatyr. Bul týraly qalalyq mobıldilik basqarmasynyń basshysy Ǵanı Myrzahanov aıtyp berdi, dep habarlaıdy QazAqparat tilshisi.

«Qalanyń kóshe-jol jelisin baqylaý barysynda 1 050 sharshy metr jol jabynynyń buzylǵany, 410 metr jıektar qulatylǵany, 98 metall tor buzylǵany anyqtaldy. Jóndeý-qalpyna keltirý jumystary aıaqtaldy. Jaıaý júrginshi joldarynyń 2025 sharshy metr kespekshesi alynǵan. Qazir jaıaý jol jabyny qalpyna keltirildi», - dedi basqarma basshysy.

Onyń aıtýynsha, Almatyda 46 baǵdarsham men 121 jol belgisi zaqymdalǵan. Búginde olar tolyǵymen qalpyna keltirildi.

Sonymen qatar, avtobýs pavılondaryn qalpyna keltirilip jatyr. 43 avtobýs pavılony búlingen, onyń 23-i tolyq qalpyna keltirildi. Qalǵan 20 pavılondy qańtar aıynyń sońyna deıin jóndeý josparlanyp otyr. Bul jumystar jeke ınvestorlardyń qarajaty esebinen júrgiziledi.

«Sondaı-aq, «AlmatyBaık» -tyń 220 velosıpedi men 21 velobeketi buzylǵan. 170 velosıped urlanǵan. Qazirgi ýaqytta IT-júıesin qalpyna keltirý jáne tekserý jumystary júrgizilýde. Halyqqa arnalǵan servısti jańartý 20 qańtarǵa deıin josparlanǵan», - dedi Ǵanı Myrzahanov.

Ol zaqymdalǵan velosıpedterdi jóndeý jáne urlanǵan velosıpedterdi qalpyna keltirý úshin qosymsha qarajat bólý máselesi pysyqtalyp jatqanyn atap ótti.

Aqyly avtoturaqtardyń qyzmeti tótenshe jaǵdaı rejımi aıaqtalǵanǵa deıin toqtatylǵan.

Budan bólek, qalada 24 parkomat búlingen. Búgingi kúni atalǵan parkomattardy jóndelip jatyr. Jóndeý-qalpyna keltirý jumystaryn qańtar aıynyń sońyna deıin aıaqtaý josparlanǵan.

Qalalyq mobıldilik basqarmasynyń basshysy sondaı-aq jol aıyryqtarynda, ótpelerde jáne metroda qurylys-montajdaý jumystary qaıta bastalǵanyn habarlady.


Joǵary qaraı