Almatyda koronavırýspen kúreske 89,4 mlrd teńge jumsaldy
ALMATY. QazAqparat - Almatyda COVID-19-ben kúresý úshin 89,4 mlrd teńge bólindi. Bul týraly Almaty qalasynyń ákimi Baqytjan Saǵyntaev málim etti, dep habarlaıdy QazAqparat tilshisi.
«Almaty ákimdigi úshin - azamattardyń ómiri men densaýlyǵyn qorǵaý basty basymdyqtardyń biri. Koronavırýs indetimen kúresý úshin 89 mlrd teńgeden astam qarjy bólindi. Bul tek bıýdjettiń aqshasy emes, bizge bıznes kómekke keldi»,– dedi Baqytjan Saǵyntaev.
Ákimniń aıtýynsha, bul aqsha juqpaly aýrýlar aýrýhanalarynyń qurylysyna jáne jalpy qalalyq zerthanalyq jelini ortalyqtandyrýǵa jumsaldy. PTR zertteýiniń táýliktik qýaty 14 myńǵa deıin ulǵaıtyldy, ony táýligine 25 myńǵa deıin arttyrýǵa bolady.
Sondaı-aq, alǵashqy medıtsınalyq-sanıtarlyq kómek jumysyn kúsheıtý boıynsha sharalar qabyldandy. Bıyl qalada 11 dárigerlik ambýlatorııa salyndy, kelesi jyly taǵy 11 dárigerlik ambýlatorııa paıdalanýǵa beriledi.
