Aýa raıy
Astana 0 °S
Almaty 10 °S
valıýta baǵamy
USD 421.58
EUR 496.83
RUB 5.53
CNY 62.20

Almatyda quda kútip, qyz uzatqandarǵa 5 mln teńge kóleminde aıyppul salyndy

2020 jyldyń 22 qyrkúıek 2020 14:20

ALMATY. QazAqparat – Almaty qalasynyń taýarlar men qyzmetterdiń sapasy men qaýipsizdigin baqylaý departamentinde monıtorıng toptarynyń jumysy barysynda sońǵy aptada 10 nysanda jáne 51 jeke tulǵanyń karantın rejımin buzǵany anyqtaldy. Salynǵan aıyppuldyń jalpy somasy - 5 mln teńge, dep habarlaıdy QazAqparat tilshisi.

«Monıtorıngi toptary osy jyldyń 17 tamyzynan beri shaǵyn jáne orta bıznes salasynda epıdemııalyq talaptardy saqtaýyna qatysty 9 myńnan astam tekserý júrgizdi. Ákimshilik quqyq buzý boıynsha 3801 hattama toltyryldy. 2693 jeke tulǵaǵa maska rejımin buzǵany úshin aıyppul salyndy. Shaǵyn jáne orta bıznestiń 1635 sýbektisi óz erkimen qyzmetin toqtatty. Sottyń qaraýyna 19 materıal tapsyryldy» dep habarlady qala ákimdiginiń baspasóz qyzmeti.

Negizgi tártip buzý faktileri – maska rejıminiń saqtalmaýy, jumys rejıminiń buzylýy, dezınfektsııalyq quraldardyń joqtyǵy, sonymen birge jappaı kópshilik sharalardy uıymdastyrý.

«18 qyrkúıekte Jetisý aýdany Jangeldın kóshesi, 193 mekenjaıynda ornalasqan «Danııar» meıramhanasynda uzatý toı ótkizilgeni týraly aqparat keldi. Odan keıin jedel túrde monıtorıng toby Jetisý aýdanynyń jergilikti polıtsııa qyzmetiniń qyzmetkerlerimen birlesip tekserýge bardy. Banket 50 adamnyń qatysýmen ótkizilgen. Jeke kásipkerge QR Ákimshilik quqyq buzý kodeksiniń 425-baby 1-tarmaǵy boıynsha 230 AEK mólsherinde aıyppul salyndy» delingen habarlamada.

Budan bólek, 20 qyrkúıekte túngi ýaqytta Medeý aýdanynda jekemenshik úıde qudalyq ótkizilip jatqany týraly aqparat kelip túsken. Tekserý barysynda aqparat rastalǵan. Shara uıymdastyrýshylaryna qatysty eki ákimshilik hattama toltyryldy.

«Sonymen birge, Áýezov aýdanynyń monıtorıng toptarynyń jumysy barysynda «Mıata» kafeterıiniń túngi 23-00-den keıin jumys istegeni, sondaı-aq, adamdardyń toptasyp, jınalǵany anyqtaldy. Ákimshilik quqyq buzý kodeksiniń 425-baby 1-tarmaǵyna sáıkes 230 AEK mólsherinde aıyppul salyndy. Bas memlekettik dárigerdiń 2020 jylǵy 15 tamyzdaǵy qaýlysyna sáıkes, úılený toıyn, mereıtoı, qudaıy tamaq ótkizýge tyıym salynǵan. Sonymen birge úıge kóp adamnyń kelýine bolmaıdy. Bul sharalar koronavırýs ınfektsııasynyń taralý qaýpin tómendetý úshin qajet» delingen aqparatta.

Eske salaıyq, Almaty qalasy ákiminiń tapsyrmasymen 26 monıtorıng toby karantın sharalarynyń saqtalýyn qadaǵalaıdy.
Onyń quramyna aýdan ákimdikteriniń ókilderi, taýarlar men qyzmetterdiń sapasy men qaýipsizdigin baqylaý departamenti jáne polıtsııa qyzmetkerleri engen.


Avtor Alma Muqanova
Basty sózder: Almaty, Oqıǵa, Zań, Karantın, Qaýipsizdik,
Joǵary qaraı