Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Almatyda medqyzmetkerlerdiń 83 paıyzy koronavırýs vaktsınasyn saldyrdy

2021 jyldyń 8 mamyr 2021 15:34

ALMATY. QazAqparat- Almatyda ýchaskelik polıtseılerdiń 94% -y, medıtsına qyzmetkerleriniń 83%-y jáne pedagogtardyń 99% paıyzy koronavırýs vaktsınasyn saldyrdy. Bul týraly Respýblıkalyq elektrondyq densaýlyq saqtaý ortalyǵynyń Almaty qalalyq fılıalynyń dırektory Gúlnar Ysqaqova málim etti, dep habarlaıdy QazAqparat tilshisi.

Almatyda COVID-19-ǵa qarsy jappaı vaktsınatsııa jalǵasýda. Qala boıynsha barlyǵy 247 104 adam ekpe aldy. Búgingi tańda megapolıste 214 pýnkt jumys isteıdi, onda 1 282 adamnan turatyn 315 egý brıgadasy bar.

Respýblıkalyq elektrondyq densaýlyq saqtaý ortalyǵynyń Almaty qalalyq fılıalynyń dırektory Gúlnar Ysqaqovanyń aıtýynsha, jumystyń ereksheligin eskere otyryp, halyqpen ózara is-qımyl jasap, qaýipsizdikti qamtamasyz etý jáne qorshaǵan adamdardyń densaýlyǵy men ómirin qorǵaý maqsatynda vaktsınalardy óz erkimen alatyn maqsatty toptar ekpemen barynsha qamtylǵan.

Almaty qalasy boıynsha basymdyq berilgen toptardy vaktsınatsııalaý kórsetkishteri:

- medıtsına qyzmetkerleriniń - 83,3% vaktsına aldy;

- pedagogtardyń - 99,7%;

- ýchaskelik polıtseıler - 94,4%;

- medıtsınalyq - áleýmettik jáne jabyq balalar mekemeleriniń qyzmetkerleri men kontıngenti - 65%;

-TJM, Qorǵanys mınıstrligi, ІІM qyzmetkerleri - 78%.

Sonymen qatar, ol almatylyqtar koronavırýsqa qarsy egý naýqanyna, ásirese aǵa býyn ókilderi jaýapkershilikpen qaraıtynyn atap ótti. Qazirdiń ózinde vaktsınany 65 jastan asqan 31 myńnan astam azamat aldy, olardyń arasynda 90 jastaǵy qarttar da bar.

Medıtsına qyzmetkerleriniń aıtýynsha, aǵa býyn ókilderi vaktsınadan jeńil ótedi, janama áserler baıqalmady.

Vaktsınatsııadan ótken kásiporyndardyń jalpy sanynyń 50%-y offlaın rejımine orala alady.

«Turǵylyqty orny men Almaty qalasynda tirkeýiniń bar-joǵyna qaramastan, kez kelgen tilek bildirgen adam koronavırýstan ekpe ala alady. Almatyda turýǵa yqtııarhaty bar shetel azamattaryn, eńbek mıgranttaryn, bosqyndardy jáne sheteldik stýdentterdi tegin vaktsınatsııalaı alamyz, búginde qalada olardyń sany 7 myńǵa jýyq», - dedi Gúlnar Ysqaqova.

Adamnyń qalaýy boıynsha, vaktsınanyń ekinshi komponentin 21 kúnnen keıin burynǵy keste boıynsha alýǵa bolady. Ol úshin egý pýnktine habarlasyp, erkin nysanda ótinish jazý qajet. Ázirge QR Bas memlekettik sanıtarlyq dárigeriniń qaýlysyna sáıkes ekinshi ekpe 45 kúnnen keıin alynady.

«Búgingi tańda vaktsınatsııaǵa qarsy kórsetilimderi bar aýrýlardyń tizimi az. Bastysy, ár azamattyń óz qalaýynyń bolýy, al vaktsınatsııany Almaty qalasynyń kez kelgen jerinde alýǵa bolady. Kún saıyn 214 egý pýnkti demalyssyz jáne úzilissiz jumys isteıdi, qajet bolǵan jaǵdaıda rezervte taǵy 250 egý pýnkti bar», - dep tolyqtyrdy maman.


Avtor Alma Muqanova
Basty sózder: Almaty, Vaktsına, Koronavırýs,
Joǵary qaraı