Aýa raıy
Astana 5 °S
Almaty 10 °S
valıýta baǵamy
USD 421.58
EUR 496.83
RUB 5.53
CNY 62.20

Almatyda ókpesi 90% zaqymdanǵan júkti áıel bosandy

2020 jyldyń 4 tamyz 2020 21:18

ALMATY. QazAqparat – Almatylyq dárigerler ókpesi 90% zaqymdanǵan júkti áıeldi aman-esen bosandyryp aldy, dep habarlaıdy QazAqparat tilshisi.

Almaty qalalyq densaýlyq saqtaý basqarmasynyń habarlaýynsha, 2 shilde kúni Almaty qalasyndaǵy №2 perzenthanaǵa 23 jastaǵy áıel júktiliktiń 38 aptasynda josparly túrde bosanýǵa kelgen.

«Ol perzenthanaǵa joǵary temperatýra, jótel jáne entigýmen tústi. Naýqasty tekserý kezinde dárigerler COVID-19, eki jaqty polısegmentarly pnevmonııa dıagnozyn qoıdy. Sonymen qatar, tekserý barysynda naýqastyń ókpesiniń 90% zaqymdanǵany anyqtaldy. Naýqas dereý jansaqtaý bólimine jatqyzyldy. Al, kelesi kúni onyń tolǵaǵy bastaldy. Perzenthana dárigerlerdiń komandalyq jumysy men olardyń úılesimdi áreketiniń arqasynda salmaǵy 3 keliden asatyn ul bala dúnıege keldi», - dep habarlaıdy Qoǵamdyq densaýlyq saqtaý basqarmasynyń baspasóz qyzmeti.

Bosanǵannan keıin Dınaranyń (naýqas) jaǵdaıy óte aýyr dep baǵalandy. Sondyqtan ol 27 kún boıy jansaqtaý bóliminde ókpeni jasandy jeldetý aparatyna qosyldy. Tek 29 shilde kúni ǵana naýqastyń jaǵdaıy jaqsaryp, beıindi bólimshege aýystyryldy.

«Aq halatty abzal jan, keremet dáriger, reanımatsııa bóliminiń jetekshisi – Gúlnur Altaıqyzy Baıbolovaǵa alǵysym sheksiz jáne maman retinde ǵana emes, adam retinde joǵary baǵalaımyn. Meni osyndaı dárigerge jolyqtyrǵan úshin Allaǵa rızamyn. Sondaı-aq, osy №2 perzenthananyń barlyq medıtsına qyzmetkerlerine naýqastarǵa úlken jaýapkershilikpen jáne qurmetpen qarap, tynymsyz eńbegine, sapaly medıtsınalyq qyzmeti men qamqorlyǵy úshin alǵys aıtamyn. Dárigerler maǵan ekinshi ómir syılady jáne osy kisilerdiń arqasynda áli ózim kórmegen deni saý sábı dúnıege keldi. Búgin sábıimdi birinshi ret kórip, qushaǵyma basamyn», - deıdi Dınara Serikbol.

Dúnıege COVID-19 sımptomy joq, deni saý náreste keldi. Sábıdi perzenthanadan eki kúnnen keıin shyǵarǵan. Qazirgi ýaqytta ol ata-ájesiniń qolynda. Balanyń atyn Omar dep qoıdy.

Avtor Alma Muqanova
Basty sózder: Medıtsına, Koronavırýs, Almaty,
Joǵary qaraı