Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Almatyda oqýshylardyń 14, mektep jasyna deıingi balalardyń 6 protsenti KVI juqtyrǵan

2021 jyldyń 4 qarasha 2021 15:12

ALMATY. QazAqparat - Almatyda kúz mezgilinde respıratorlyq aýrýlar beleń alǵan. Bul týraly Óńirlik kommýnıkatsııalar qyzmetiniń baspasóz maslıhatynda Almaty qalasy sanıtarlyq-epıdemıologııalyq baqylaý departamenti basshysynyń orynbasary Sádýaqas Baıǵabylov málimdedi.

Almatyda 1-shi qyrkúıekten bastap JRVI juqtyrýdyń 74 myńnan astam jaǵdaıy tirkeldi.

Sádýaqas Baıǵabylov almatylyqtardy sanıtarlyq-epıdemıologııalyq qaýipsizdik sharalaryn saqtaýǵa shaqyrdy, sebebi, shekaralas elderde COVID-19 jaǵdaıy nasharlaýda. Sonymen qatar, koronavırýs JRVI retinde maskırovka jasaı alady.

«Almatyda epıdemıologııalyq jaǵdaı optımıstik stsenarıı boıynsha damyp kele jatqanyna qaramastan, jeke qorǵanys quraldaryn nazardan tys qaldyrmaý kerek, qoldy jıi jýý, antıseptıktermen óńdeý, qashyqtyqty saqtaý, úı-jaılardy jeldetý qajet. Vaktsınatsııa ózińizdi qorǵaýǵa kómektesedi. Biz «sary aımaqta» ekenimizdi este ustaǵan jón, bul koronavırýspen kúres sharalarynyń saqtalýyn baqylaýdy kúsheıtýdi bildiredi», - dedi SEBD basshysynyń orynbasary.

Sanıtarlyq dárigerlerdiń aıtýynsha, 1 qyrkúıekten bastap azamattar arasynda JRVI-diń 74 426 jaǵdaıy tirkelgen. Ótken jyly osy kezeńde barlyǵy 17 731 jaǵdaı boldy. S. Baıǵabylov JRVI adamdardy koronavırýsqa osal etetinin atap ótti.

Aıta keteıik, búgingi kúni Almatyda koronavırýs pen tumaýǵa qarsy belsendi vaktsınalaný jalǵasýda. Qazirdiń ózinde 105 114 turǵyn tumaýǵa qarsy ekpe aldy, olardyń basym bóligi bıýdjet qarajaty esebinen egildi.

«Koronavırýsqa qarsy ımmýndaý naýqany jalǵasýda. Almatyda ujymdyq ımmýnıtettiń deńgeıi 55,2%-dy quraıdy. Onyń ishinde vaktsınatsııalanǵan azamattardyń 47,2%-y jáne jyl basynan beri aýyryp jazylǵan adamdardyń 8%-y. Bizge senimdi ımmýndyq qabat qalyptastyryp, halyqtyń 80% vaktsınatsııalaý qajet», - dedi S. Baıǵabylov.

SEBD basshysynyń orynbasary vaktsınatsııalanbaǵan azamattardyń koronavırýsty juqtyrý qaýpi áli de bar ekenin aıtty. Mysaly, bir apta ishinde KVI-men aýyrǵan 1033 adamnyń 194-i egilgen, qalǵan 81%-y egilmegen.

Epıdemıologtar kóbinese vaktsınatsııadan jaltarǵan azamattar juqtyrady dep sanaıdy. Taldaý kórsetkendeı, juqtyrǵandardyń 30% - dan astamy – ózin-ózi jumyspen qamtyǵandar nemese jumyssyzdar, 20%-dan astamy – zeınetkerler, 19,5%-y – kásiporyn qyzmetkerleri. Juqtyrǵan oqýshylar sany 14% jáne mektep jasyna deıingi balalar – 6% quraıdy.

Aıta ketsek, oqýshylardyń 94%-y synypta emes, úıde eresek otbasy múshelerimen baılanysta bolǵan.

Negizgi juqtyrý oryndary burynǵysynsha saýda obektileri – 28%, qoǵamdyq kólik – 21,4%, otbasylardaǵy baılanystar – 22,3% jáne bazarlar – 8% bolyp qalýda.

S. Baıǵabylov vaktsınalaný adamdy koronavırýstyq ınfektsııadan qorǵaýǵa kepildik bere almaıtynyn, biraq derttiń jeńil túrde ótetinin atap ótti. Eske salsaq, almatylyqtar qaladaǵy 137 egý pýnktiniń birine baryp, tegin ekpe ala alady.


Joǵary qaraı