Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Almatyda Jeltoqsan oqıǵasyna arnalǵan kezdesý ótti

2021 jyldyń 26 qazan 2021 18:29

ALMATY. QazAqparat - Almatyda Jambyl atyndaǵy jasóspirimder kitaphanasynda Jeltoqsan kóterilisine 35 jyl, Qaırat Rysqulbekovtyń týǵanyna 55 jyl tolýyna oraı «Muzda janǵan alaý» atty onlaın is-shara ótti, dep habarlaıdy QazAqparat tilshisi.

Onlaın kezdesýde belgili aqyn, Jeltoqsan oqıǵasyna qatysýshy Bolat Sharahymbaı qonaq boldy. «Jeltoqsan oqıǵasy týraly kóp nárseni aıtýǵa bolady. Ony biz – táýelsizdigimizdiń anasy desek bolady. Sebebi, bul kóterilis bolmasa, bes jyldan keıin táýelsizdik alar ma edik, almas pa edik, ol jaǵy belgisiz», - dedi B. Sharahymbaı kezdesý barysynda.

Aqyn kóteriliske qatysqanda stýdent bolǵan.

«Barlyq stýdentter sekildi alańǵa baryp, kóteriliske qatystyq. «Qonaevty ornynan alyp tastapty» degendi estigende, qatty ashýlandyq. «Nege alyp tastady, qandaı haqysy bar, nege halyqtan suramaıdy, nege bizdiń pikirimizdi tyńdamaıdy?» degen oılar mazalady. Endi stýdentpiz ǵoı, jalyndap turǵan shaǵymyz. Іshimiz alaı-dúleı. Alǵash alańǵa barǵan kezde, eshqandaı jaman oıymyz bolǵan joq», - dedi ol.

Bolat Sharahymbaı alańda ózine qamqorlyq tanytqan qyzben 15 jyldan keıin qaıta kezdeskenin eske aldy.

«Men qazirgi Táýelsizdik monýmenti turǵan jerde boldym. Sol jerde ústime sýyq sý shashyp, turǵan jerimde quladym. Shapkam ushyp, qaıda qalǵany belgisiz. Bir qyzdyń jany ashyp, qasyma keldi, moınyndaǵy uzyn aq sharfyn sheship, basyma orady. «Aǵa, ústińiz sý boldy, aýyrasyz, endi úıge qaıtyńyz» dedi. Ony tyńdaǵan joqpyn, alańda qala berdim. Taǵdyrdyń jazýyna qarańyz, keıin ol qyzben 15 jyl ótken soń, qaıtadan Taldyqorǵanda kezdestim», - deıdi jeltoqsanshy.

Sondaı-aq, ol kóshede soqqyǵa jyǵylǵan qyzǵa arasha túskenin de aıtty.

Halyq qaharmany Qaırat Rysqulbekov jaıly óz oıyn bildire otyryp: «Men onymen tanys bolǵan joqpyn. Ol týraly keıin bildim. Óleń shyǵaratynyn, júregi aqyndyqqa jaqyn jan ekenin bildim. Qazir tiri bolsa 55-ke tolar edi. Oǵan «Halyq qaharmany» ataǵy berildi. Bul óte durys boldy. Biraq, tek marqumdarǵa ǵana emes, sonymen birge, Jeltoqsan alasapyranyn óz kózimen kórgen búgingi kózi tiri batyrlarǵa da bul ataqty berse, artyq etpes dep oılaımyn. Sebebi, olardyń da kórgen beınetteri kóp. Sonymen qatar, búgingi urpaqqa kózi tiri kóterilisshilerdi dáriptep, áspettese, odan utylmaımyz der edim. Jastarǵa aıtarym, birinshi kezekte óz ultyńdy, ana tilińdi súı. Sonda bizdiń elimizdiń mereıi artyp, ósip, órkendep, jaqsy damıtyn bolady», - degendi jetkizdi Bolat Sharahymbaı.


Joǵary qaraı