Aýa raıy
Astana -2 °S
Almaty 2 °S
valıýta baǵamy
USD 421.58
EUR 496.83
RUB 5.53
CNY 62.20

Almatylyq kommýnıster zeınetaqy júıesin qaıta qaraýǵa shaqyrdy

2020 jyldyń 29 qyrkúıek 2020 03:21

ALMATY. QazAqparat - Qoǵamdyq talqylaýda almatylyq kommýnıster zeınetaqy júıesin reformalaý máselesine keńinen toqtaldy, dep habarlaıdy QazAqparat tilshisi.

Shet elderdegi zeınetaqy júıesin mysalǵa keltirgen Qazaqstan kommýnıstik halyq partııasynyń múshesi Aqbópe Ábilqasymova bizdiń eldegi zeınetaqy júıesin qaıta qaraý qajet dep sanaıdy.

«Jyl saıyn Avstralııanyń Monash ýnıversıteti «Mersıe» konsaltıng kompanııasymen birge álemdik zeınetaqy ındeksin júrgizedi. Zertteý nátıjesi boıynsha olar ekinshi jyl qatarynan álemdegi eń jaqsy zeınetaqy júıesi retinde Nıderland pen Danııany atady. Danııada zeınetaqy júıesi qarjylandyrylady. Bul elde adamdar zeınetke 67 jasta shyǵady. Olarǵa jınaqtaýshy qorǵa jarna memlekettik bıýdjetten tólenedi. Osylaısha, olardyń zeınetaqysy óte joǵary bolady. Al Nıderlandta qarajattyń 50% memlekettik bıýdjetten túsedi. Qalǵanyn jumys berýshi tóleıdi. Qazir bizge jınaqtaýshy júıeniń turaqtylyǵyn baǵalaý qajet. Biz durys baǵyttamyz ba, osyny túsinýimiz kerek», - deıdi spıker.

Kezdesý barysynda partııa múshesi Gúldana Nurpeıisova da zeınetaqy júıesine qatysty oz oıyn ortaǵa saldy.

«Qazir qazaqstandyqtardyń zeınetaqy mólsheri ár túrli. Iıa, ındeksteý ınflıatsııa men ekonomıkalyq kórsetkishterdi eskere otyryp júzege asyrylady. Muny bárimiz kórip otyrmyz. Biraq biz muny jetkiliksiz dep sanaımyz. Qarttar men aǵa býynǵa qatysty zań shyǵarý kerek. Olardyń mártebesin anyqtaý qajet. Bul zań zeınetkerlerdiń ómirin, olardyń zeınetkerlik kiristerin, emdelýin jáne basqa da mańyzdy máselelerdi qarastyrady. Dári-dármek pen azyq-túlik qymbattady. Kóbi zeınetkerlik jasqa da jetpeıdi.Sondyqtan zeınetke shyǵatyn jas pen jumys kúshiniń barlyq sanatyn qaıta qaraý qajet. Bizde aýyr ári qaýipti óndiriste jumys isteıtinder bar. Sondyqtan arnaıy komıssııa qurý kerek. Bizge qoǵamdyq tyńdaýlar uıymdastyrý qajet. Eń tómengi zeınetaqy deńgeıin kótergen jón. Zeınetaqy júıesine qatysty kóptegen suraqtar bar. Bolashaq zeınetkerlerdiń júıesi qandaı bolady, biz bul týraly qazir oılanýymyz kerek», - deıdi Gúldana Nurpeıisova.

Joǵary qaraı