Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Almatylyqtar krannan qurttarmen birge aqqan las sýǵa shaǵymdandy

2021 jyldyń 7 qazan 2021 17:38

ALMATY. QazAqparat – Almatynyń Naýryzbaı aýdanynyń turǵyndary krannan qurttarmen birge aqqan las sýǵa shaǵymdanýda. Máselege qatysty «Almaty Sý» mekemesi túsinik berdi, dep habarlaıdy QazAqparat.

«Qurt aralasqan las sý Naýryzbaı aýdanyndaǵy Taýjoly yqshamaýdanynda shyqty. Sýdy eshqandaı tazalamaı, birden ózennen alatyn sekildi. Taýjolyndaǵy las sýdan nemese taza sýdyń joqtyǵynan sharshadyq. Búkil Naýryzbaı aýdany sý máselesi boıynsha zardap shegýde», - delingen vıdeoǵa berilgen jazbada.



«Almaty sý» MKK málimetinshe, Taýjoly yqshamaýdanyndaǵy úılerge «Almaty sý» jelisi boıynsha keletin sýdan eshqandaı qospalar men bıologııalyq elementter tabylǵan joq. Osy yqshamaýdanǵa keletin sýyq sýdyń sapasy basqa aýdandardaǵy sııaqty halyqqa arnalǵan aýyzsý parametrlerin retteıtin normatıvtik qujattarǵa sáıkes keledi.

«Degenmen, áleýmettik jelide taraǵan vıdeoǵa baılanysty, sondaı-aq vıdeony taratýshy óz mekenjaıyn naqty aıtpaǵan soń, kásiporyn mamandary atalǵan turǵyn úı massıviniń birneshe úıinen sý synamalaryn aldy.

Jınalǵan sý synamalaryna jasalǵan taldaý jáne «Almaty sý« MKK-nyń jaýapkershilik aımaǵyndaǵy Taýjoly yqshamaýdanynyń sýmen jabdyqtaý júıesin zertteý nátıjeleri sýyq sýmen jabdyqtaý qyzmeti boıynsha bekitilgen normalar men erejelerden qandaı da bir aýytqýlar joq ekenin kórsetedi. Atalǵan yqshamaýdanda qalalyq sýmen jabdyqtaý júıesinen basqa, turǵyndar basqa qyzmet kórsetýshilerdiń sý qubyry jelilerin paıdalanady. Endi osyǵan uqsas jaǵdaılarda ýákiletti memlekettik organǵa júginýdi usynamyz», - dedi «Almaty sý» MKK-da.


Joǵary qaraı