Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Almatynyń bir aýdany «servıstik polıtsııa» tájirıbesine arnalǵan pılottyq aımaq bolady

2021 jyldyń 20 qazan 2021 22:40

ALMATY. QazAqparat - Almatynyń Alataý aýdany «servıstik polıtsııa» tájirıbesine arnalǵan pılottyq aýmaq bolyp belgilendi, dep habarlaıdy QazAqparat tilshisi.

Almaty qalasy ákiminiń orynbasary Erjan Babaqumarov qala ákimi Baqytjan Saǵyntaevtyń tapsyrmasy boıynsha Almatyda «servıstik polıtsııa» tájirıbesin ulǵaıtý jóninde keńes ótkizdi.

Keńestiń maqsaty Prezıdenttiń «Halyq birligi jáne júıeli reformalar – eldiń órkendeýiniń berik negizi» atty Joldaýynda belgilengen mindetterdi iske asyrý sheńberinde shahardyń qoǵamdyq qaýipsizdigin qamtamasyz etýde servıstik tásildi engizýge arnaldy.

Quqyq buzýshylyqty aldyn alý jumystarynyń tıimdiligin arttyrý maqsatynda buǵan deıin polıtsııanyń servıstik modeli pılottyq rejımde Alataý aýdanynyń «Ójet» yqshamaýdany men Bostandyq aýdanyndaǵy «Keremet» turǵyn úıinde iske qosylǵan.

Taldaý nátıjesi negizinde atalǵan aýmaqta quqyq buzýshylyqtardyń jolyn kesý maqsatynda jumysty kúsheıtý boıynsha sharalar qabyldanyp, polıtsııanyń qosymsha modýldik beketi ornatyldy, tártip saqshylary jaıaý narıadynyń patrýldeýi ulǵaıtyldy.

Erjan Babaqumarov pılottyq jobany iske asyrýdyń aralyq nátıjelerine sáıkes servıstik polıtsııa tájirıbesin yqshamaýdan deńgeıinen Alataý aýdanyna deıin keńeıtý týraly sheshim qabyldanǵanyn habarlady.

Búginde bul aýdanda 300 myńnan astam halyq turady.

Osylaısha, Alataý aýdanynyń bar aýmaǵy servıstik tásildi engizýdiń pılottyq aımaǵy bolyp belgilendi.

Osyǵan oraı, aýdan ákimi apparaty janyndaǵy qoǵamdyq qaýipsizdikti qamtamasyz etýde servıstik tásildi engizý, uıymdastyrýshylyq jáne ınstıtýtsıonaldyq sıpattaǵy tıisti jumystardy júrgizý boıynsha aýmaqtyq vedomstvoaralyq top qurý jóninde tapsyrmalar berildi.

Atap aıtqanda, jobalaý keńsesi aýdan turǵyndarymen birlesip, turǵylyqty halyq arasynda taldaý men saýalnama júrgizedi, quqyq buzýshylyqtarǵa yqpal etetin sebepter men jaǵdaılardy skanerleıdi. Bul jumystyń nátıjesi pılottyq aýmaqty kartaǵa túsirý men ýchaskelik ınspektorlardyń jumysyn túzetý, patrýldeý júıesin keńeıtý, qosymsha beınebaqylaý kameralaryn ornatý, jaryqtandyrý syndy sheshimder qabyldaýmen sıpattalady.

Jalpy, polıtsııanyń servıstik modelin keńeıtý quqyq buzýshylyqtardyń aldyn alý jáne qoǵamdyq qaýipsizdikti nyǵaıtý salasyndaǵy jumystyń tıimdiligin arttyrýǵa múmkindik beredi.

Aıta keteıik, Almatyda «Halyqqa qoljetimdi polıtsııa» qaǵıdaty aıasynda qalanyń ýchaskelik polıtsııa ınspektorlarynyń shtaty 113-ke ulǵaıtyldy. 9 qosymsha ýchaskelik polıtsııa pýnkti satyp alyndy.

Odan bólek, 441 beınetirkegish pen 432 planshet alyndy.

Saıabaq aımaqtarynda, azamattardyń jappaı demalý oryndarynda patrýldik narıadtar úshin 55 birlik kólik quraldaryn satyp alýǵa qarajat bólindi.


Joǵary qaraı