Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Ámire Qashaýbaevtyń zıraty jańartyldy

2021 jyldyń 7 qarasha 2021 21:54

ALMATY. QazAqparat - Almatyda qazaqtyń áıgili ánshisi Ámire Qashaýbaevtyń zıraty jańartyldy, dep habarlaıdy QazAqparat tilshisi.

Ámire Qashaýbaevtyń zıratyn jańartý týraly bastama kótergen Shyǵys Qazaqstan oblystyq Ámire Qashaýbaev atyndaǵy memlekettik fılarmonııanyń dırektory Aıbek Bekbosynov.

«Bizdiń fılarmonııamyz Ámire Qashaýbaev atynda bolǵandyqtan ánshi atamyzdyń zıratynyń qazirgi jaǵdaıyn kórgim keldi. Osy maqsatpen Almatyǵa arnaıy ushyp keldim. Ámireniń zıraty Almatydaǵy ortalyq zıratta ornalasqan eken. Zıratyn kórip, ony jóndep, jańartý qajet ekenine kózim jetti. Sodan ózim tanıtyn Semeıdegi kásipker jigitterge habarlasyp, zıratty jóndeý týraly óz oıymdy aıttym. Olar qoldaý bildirip, osylaısha Ámire atamyzdyń zıraty jańartyldy. Árıne aıta keteıik, Ámire – ol tek Semeı ǵana emes, ol bar qazaqtyń Ámiresi», - dedi oblystyq fılarmonııanyń dırektory.

Áıgili ánshiniń jańartylǵan zıratynyń basyna Ulyqbek Esdáýlet, Tursyn Jurtbaı, Roza Rymbaeva Seken Turysbekov sekildi belgili ádebıet, óner, mádenıet qaıratkerleri jınalyp, quran baǵyshtap, áıgili ánshiniń arýaǵyna taǵzym etti.

Aıta keteıik, Almatynyń ortalyq zıratyna Álibı Jangeldın, Isa Baızaqov, Dına Nurpeıisova, Muhtar Áýezov, Ámire Qashaýbaev, Ermuhan Bekmahanov, Ahmet Jubanov, Qalıbek Qýanyshbaev, Kúlásh Baıseıitova, Qanysh Sátbaev, Sháken Aımanov, Muqan Tólebaev, Qapan Mýsın syndy belgili tulǵalary jerlengen.

Eske salsaq, Ámire Qashaýbaev shet elde óner kórsetip qazaq elin tanytqan tuńǵysh ánshi boldy. Germanııanyń Maındaǵy Frankfýrt qalasyndaǵy kontsertke qatysyp, qazaqtyń halyq ánderin taǵy da álemge pash etti. Ámire Qashaýbaevtyń ánderi dúnıe júzi mádenıetiniń iri ókilderi Romen Rollan, Anrı Barbıýs taǵy basqalar tarapynan joǵary baǵa alǵan. A.V. Zataevıch dara talanttyń «Balqadısha», «Dýdaraı», «Bes qarager», «Kók kóbelek» taǵy da basqa ánderin jazyp alǵan.

Onyń ánshilik ónerin, ónerdiń parqyn tereń túsinetin mamandar A.V.Lýnacharskıı, G.Lıýbımovter jáne qazaq ádebıeti men óneriniń kórnekti ókilderi M.Áýezov, S.Seıfýllın, I.Baızaqov, Á.Marǵulan, J.Elebekov, A.Jubanov, Q.Jandarbekovter joǵary baǵalaǵan.

Ámire Qashaýbaev jóninde birneshe zertteýler, kórkem shyǵarmalar jaryq kórgen.


Avtor Dýman Arǵyngeldi
Basty sózder: Qoǵam, Mádenıet, Almaty,
Joǵary qaraı