Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Apat bolǵan Petropavldaǵy JEO ıesi 4,9 mln teńge aıyppulmen kelispedi

2022 jyldyń 23 sáýir 2022 13:03

PETROPAVL. QazAqparat – Soltústik Qazaqstan oblysynyń mamandandyrylǵan ákimshilik soty jaqynda murjasy qulaǵan jylý-elektr ortalyǵynyń ıesi - «SevKazEnergo» AQ-nyń Tabıǵı monopolııalardy retteý komıtetiniń oblys boıynsha departamentine qatysty talabyn qanaǵattandyrmady, dep habarlaıdy QazAqparat tilshisi.

QR Ulttyq ekonomıka mınıstrligi Tabıǵı monopolııalardy retteý komıteti baspasóz qyzmetiniń málimetinshe, atalǵan komıtettiń SQO boıynsha departamenti (TMRKD) «SevKazEnergo» AQ-ǵa jospardan tys tekserý júrgizgen. Onyń qorytyndysy boıynsha kompanııa «Tabıǵı monopolııalar týraly» QR zańyn, naqtyraq aıtqanda tabıǵı monopolııalar sýbektilerin satyp alý rásimderin saqtamaǵanyn anyqtady.

Budan bólek, TMRKD QR Ákimshilik quqyq buzýshylyq týraly kodeksiniń 164-baby 4-bóligi boıynsha is qozǵady. Bul bap boıynsha 1600 AEK, ıaǵnı 4,9 mln teńge mólsherinde aıyppul qarastyrylǵan.

«SevKazEnergo» AQ munymen kelispeı, SQO mamandandyrylǵan ákimshilik sotyna TMRKD-nyń tekserý nátıjeleri týraly aktisin joqqa shyǵarýdy surap, aryz túsirgen.

Alaıda, sot «SevKazEnergo» AQ-nyń talap-aryzyn qanaǵattandyrmady.

«SevKazEnergo» AQ-nyń quramyna SQO-daǵy 4 kásiporyn kiredi, olar: «SK REK» AQ, «Petropavl Jylý Jelileri» JShS, «SevKazenergosbyt» JShS jáne bıyl qys boıy apattan «kóz ashpaǵan» Petropavldaǵy 2-inshi Jylý-elektr ortalyǵy.

Eske salaıyq, 20 naýryz kúni Petropavldaǵy Jylý-elektr ortalyǵynyń tútin murjasy qulaǵan edi.

Prezıdent Qasym-Jomart Toqaev SQO ákimine tez arada turǵyndardy jylýmen qamtýǵa tapsyrma berdi.

Qulaǵan murjanyń úıindisi astynda bir jumysshy qalyp, mert boldy.

Osy oqıǵaǵa qatysty qylmystyq is qoǵalyp, JEO dırektory jáne bas ınjener qamaýǵa alyndy.

Keıin «SevKazEnergo» AQ bas dırektory da qamaldy.

Bir aptadan keıin, 27 naýryz kúni kásiporynda taǵy da apat bolyp, birneshe qazandyq isten shyqty.

QR Energetıka mınıstrligi Petropavldaǵy JEO apatqa ne sebep bolǵanyn aıtty.

Óńirge kelgen Energetıka mınıstri Bolat Aqsholaqov jaǵdaıdy kórip, ortalyqty qalpyna keltirýge 17,5 mlrd teńge kerek ekenin atap ótti.


Joǵary qaraı