Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

فۋتزالدان الەم چەمپيوناتى: قازاقستان قۇراماسى جارتىلاي فينالعا شىقتى

2021 jyldyń 28 qyrkúıek 2021 09:47

نۇر- سۇلتان. قازاقپارات - قازاقستان قۇراماسى فۋتزالدان الەم چەمپيوناتىنىڭ شيرەك فينالىندا يرانمەن شەبەرلىك بايقاستى، دەپ حابارلايدى قازاقپارات ءتىلشىسى.

كەزدەسۋ اسا تارتىستى ءوتتى. العاشقى مينۋتتاردا يراندىق سپورتشىلار تىزگىندى ءوز قولىنا الۋعا تىرىستى. ناتيجەسىندە ءبىرىنشى كەزەڭنىڭ 8-مينۋتىندا موسلەم ولادگوباد ەسەپ اشسا، 15-مينۋتتا احماد ەسمايلپۋر ەسەپتى ۇستەمەلەي ءتۇستى.

ەكىنشى كەزەڭدە قازاقستاندىق فۋتزالشىلار العا قاراي ۇمتىلدى. ويىننىڭ 25-مينۋتىندا داۋرەن تۇرساعۇلوۆ كوزدەگەن نىسانادان ءمۇلت كەتكەن جوق. ال 29-مينۋتتا ارنولد كناۋب تارازى باسىن تەڭەستىردى. ويىننىڭ 39-مينۋتىندا قازاقستاندىق تاينان جەڭىس گولىن سوقتى. وسىلايشا قازاقستان قارسىلاسىن 3:2 ەسەبىمەن جەڭدى.

توپتىق كەزەڭدە قازاقستان قۇراماسى كوستا- ريكادان 6:1، ليتۆادان 3:0 ەسەبىمەن باسىم بولدى. ال ۆەنەسۋەلامەن 1:1 ەسەبىمەن تەڭ ءتۇستى. ودان كەيىن 1/8 فينالدا تايلاندتى 7:0 ەسەبىمەن تىزە بۇكتىردى. بۇدان بۇرىن 1/4 فينالدا برازيليا ماروككونى 1:0 ەسەبىمەن جەڭگەن بولاتىن.

ال ارگەنتينا مەن رەسەي كەزدەسۋىنىڭ نەگىزگى كەزەڭى 1:1 ەسەبىمەن اياقتالىپ، پەنالتيدە ارگەنتينالىقتار 5:4 ەسەبىمەن جەڭىسكە جەتتى.

بۇگىن پورتۋگاليا - يسپانيا كەزدەسۋى پورتۋگاليالىقتار پايداسىنا 4:2 ەسەبىمەن اياقتالدى. ەندى 29 -قىركۇيەكتە وتەتىن جارتىلاي فينالدا برازيليا مەن ارگەنتينا كەزدەسسە، 30-قىركۇيەكتە قازاقستان مەن پورتۋگاليا وينايدى.

قازاقستان قۇراماسى بۇدان بۇرىن الەم چەمپيوناتىنىڭ فينالدىق ساتىسىندا ەكى مارتە باق سىناعان ەدى. 2000 -جىلى ءبىرىنشى كەزەڭنەن اسا الماسا، 2016 -جىلى 1/8 فينالعا دەيىن جەتتى. الەم چەمپيوناتىنىڭ فينالى 3-قازانعا بەلگىلەنگەن.

Basty sózder: سپورت,
Joǵary qaraı