Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

بۇگىن الەمدىك دەڭگەيدەگى تانىمال ءانشى ديماشتىڭ تۋعان كۇنى

2022 jyldyń 24 mamyr 2022 09:08

نۇر-سۇلتان. قازاقپارات - بۇگىن، ياعني 24-مامىردا تۇلعالاردان كىمدەر دۇنيەگە كەلگەن؟ قازاقپارات وقىرماندارعا ەسىمدەر كۇنتىزبەسىن ۇسىنادى.

ەسىمدەر





50 جىل بۇرىن (1972) رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ ءتورايىمى ناتاليا نيكولايەۆنا گودۋنوۆا دۇنيەگە كەلگەن. ورال قالاسىندا تۋعان. باتىس قازاقستان اۋىل شارۋاشىلىعى ينستيتۋتىن (ەكونوميست ماماندىعى بويىنشا)، رەسەي فەدەراتسياسى ۇكىمەتىنىڭ جانىنداعى قارجى اكادەمياسىن بىتىرگەن.

ەڭبەك جولىن 1993 -جىلى «ورال اگروونەركاسىپبانكتە» ەكونوميست بولىپ باستاعان. باتىس قازاقستان اۋماقتىق مەملەكەتتىك مۇلىكتى جانە اكتيۆتەردى باسقارۋ كوميتەتىنىڭ جەتەكشى مامانى، ءبولىم باستىعى، باتىس قازاقستان وبلىسى اكىمى اپپاراتىنىڭ ءبولىم مەڭگەرۋشىسى، باتىس قازاقستان وبلىستىق ەكونوميكا جانە بيۋدجەتتىك جوسپارلاۋ دەپارتامەنتىنىڭ ديرەكتورى (1997 - 2005)؛ قازاقستان رەسپۋبليكاسىنىڭ رەسەي فەدەراتسياسىنداعى ساۋدا وكىلىدىگىندە كەڭەسشى- ەكونوميست (2005-2006)؛ ماڭعىستاۋ وبلىسى اكىمىنىڭ كەڭەسشىسى (2006-2009)؛ قازاقستان رەسپۋبليكاسىنىڭ رەسەي فەدەراتسياسىنداعى ساۋدا وكىلدىگىنىڭ كونسۋلتانتى، ورىنباسارى، مىندەتىن اتقارۋشى (2009-2011)؛ قازاقستان رەسپۋبليكاسى پرەمەر-ءمينيسترى ورىنباسارىنىڭ كەڭەسشىسى (2012-2013)؛ قىزىلوردا وبلىسى اكىمىنىڭ ورىنباسارى، ەكونوميكا، قارجى جانە جۇمىسپەن قامتۋ ماسەلەلەرىنە جەتەكشىلىك ەتتى (2013-2015)؛ «نۇر وتان» پارتياسىنىڭ حاتشىسى، «نۇر وتان» پارتياسىنىڭ ساياسي كەڭەسى بيۋروسىنىڭ مۇشەسى (2015-2017)؛ قازاقستان رەسپۋبليكاسى ورتالىق سايلاۋ كوميسسياسىنىڭ مۇشەسى (2017-2018)؛

2018 -جىلعى اقپاننان بەرى قازىرگى قىزمەتىندە. قازاقستان رەسپۋبليكاسىنىڭ قۇرمەت گراموتاسى (2008) جانە «قۇرمەت» وردەنىمەن (2016) ماراپاتتالعان.





48 جىل بۇرىن (1972) قازاقستان رەسپۋبليكاسى قارۋلى كۇشتەرى جوعارى قولباسشىلىعىنىڭ وكىلى، اۆياتسيا گەنەرال- لەيتەنانتى نۇرلان جانايدار ۇلى قاربەنوۆ دۇنيەگە كەلگەن. قوستاناي وبلىسىندا تۋعان. ەكاتەرينبۋرگتەگى سۋۆوروۆ اسكەري ۋچيليشەسىن (1989)؛ 1994 -جىلى كاچينسك جوعارى اسكەري اۆياتسيالىق ۇشقىشتار ۋچيليشەسىن؛ 2001 -جىلى يۋ. ا. گاگارين اتىنداعى ر ف ق م اسكەري- اۋە اكادەمياسىن؛ 2011 -جىلى ر ف ق ك باس شتابىنىڭ اسكەري اكادەمياسىن ءبىتىردى. 2001 -جىلعى شىلدەدە اكادەميانى ءتامامداعان سوڭ اۆياتسيالىق بازانىڭ اۆياتسيالىق ەسكادريليا كومانديرى بولىپ تاعايىندالدى. سودان كەيىن شتاب باستىعى - اۆياتسيالىق بازا كومانديرىنىڭ ورىنباسارى، ءارى قاراي اۆياتسيالىق بازا كومانديرى قىزمەتىن اتقاردى. 2011 -جىلعى جەلتوقساندا اسكەري- اۋە كۇشتەرى قولباسشىسىنىڭ ءبىرىنشى ورىنباسارى – ق ر ق ك اۋە قورعانىسى كۇشتەرى اسكەري- اۋە كۇشتەرى شتابىنىڭ باستىعى بولىپ تاعايىندالدى.

2013 -جىلعى قاراشادان باستاپ اۋە قورعانىسى كۇشتەرى باس قولباسشىسىنىڭ (جاۋىنگەرلىك دايارلىق جونىندەگى) ورىنباسارى – ق ر ق ك اۋە قورعانىسى كۇشتەرى باس قولباسشىسى باسقارماسى جاۋىنگەرلىك جانە دەنە دايارلىعى باسقارماسىنىڭ باستىعى لاۋازىمىندا قىزمەت اتقاردى. 2016 -جىلدىڭ قاڭتارىنان جەلتوقسانىنا – ق ر ق ك اۋە قورعانىسى كۇشتەرى باس قولباسشىسىنىڭ ءبىرىنشى ورىنباسارى، 2016-2017 -جىلدارى قازاقستان رەسپۋبليكاسى قارۋلى كۇشتەرى باس شتابى باستىعىنىڭ ورىنباسارى لاۋازىمىندا قىزمەت اتقاردى. 2017-2020 -جىلدارى قازاقستان رەسپۋبليكاسى قارۋلى كۇشتەرى اۋە قورعانىسى كۇشتەرىنىڭ باس قولباسشىسى. Ⅱ دارەجەلى «ايبىن» وردەنىمەن ماراپاتتالعان. مەرەيتويلىق جانە ەڭبەك سىڭىرگەن جىلدارى بويىنشا 6 مەدال يەگەرى.





34 جىل بۇرىن (1988) اۋىر اتلەتيكادان الەمنىڭ ءتورت دۇركىن چەمپيونى، قىزىلوردا قالاسىنداعى «مۇز ايدىنى» كەشەنىنىڭ ديرەكتورى يليا الەكساندروۆيچ يلين دۇنيەگە كەلدى. قىزىلوردا قالاسىندا تۋعان. قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ دەنە شىنىقتىرۋ فاكۋلتەتىن بىتىرگەن. 2001 -جىلعى جەلتوقساندا سەمەيدە وتكەن ەل چەمپيوناتىندا قىزىلوردا قالاسىنىڭ مەكتەپ وقۋشىسى 13 جاسار اۋىر اتلەت ارنايى جۇلدەگە يە بولدى.

2005 -جىلى 17 جاسىندا جاسوسپىرىمدەر اراسىنداعى الەم چەمپيونى بولدى. سول جىلى 15 قاراشادا كاتاردىڭ دوحا قالاسىندا 2005 -جىلعى چەمپيوناتتىڭ تاڭداۋلى اۋىر اتلەتى اتاندى. 2006 -جىلى قىتايدا جاستار اراسىنداعى الەم چەمپيونى اتاندى. وسى جىلى سانتو- دومينگودا 94 كەلى سالماق ساناتىندا الەم چەمپيونى بولدى.

2006 -جىلدىڭ جەلتوقسانىندا كاتارداعى ازيا ويىندارىندا 94 كەلى سالماقتا 401 كەلى ناتيجەمەن چەمپيون اتاندى.

2008 -جىلى بەيجىڭ وليمپياداسىندا جەڭىمپاز بولىپ، التىن مەدالدى جەڭىپ الدى. 2010 -جىلى قازاقستاننىڭ جانە ازيا ويىندارىنىڭ چەمپيونى. 2011 -جىلى پاريجدە ءۇش دۇركىن الەم چەمپيونى اتاندى. 2012 -جىلى لوندون وليمپياداسىنىڭ چەمپيونى اتاندى، 2014 -جىلى الماتىدا وتكەن الەم چەمپيوناتىندا ءتورتىنشى رەت جەڭىسكە جەتتى.

2016 -جىلى دوپينگ داۋىنا بايلانىستى ەكى وليمپياداداعى ناتيجەلەرى قايتا قارالىپ، ح و ك تارتىپتىك كوميسسياسىنىڭ شەشىمىمەن وليمپيادانىڭ التىن مەدالدارىنان ايىرىلدى.





28 جىل بۇرىن (1994 -جىل) الەمدىك دەڭگەيدەگى تانىمال ءانشى، كومپوزيتور، مۋلتيينسترۋمەنتاليست ديماش (دىنمۇحاممەد) قانات ۇلى قۇدايبەرگەن دۇنيەگە كەلدى. اقتوبە قالاسىندا تۋعان. ديماشتىڭ اتا- اناسى - تانىمال انشىلەر قانات جانە سۆەتا ايتبايەۆتار. ول العاش رەت سپەكتاكلدە ويناپ، كوپشىلىككە تانىلا باستادى. بەس جاسىندا تۇڭعىش رەت مۋزىكالىق كوللەدج ساحناسىندا ءان سالعان. التى جاسىندا «اينالايىن» رەسپۋبليكالىق بايقاۋىنىڭ «فورتەپيانو» نوميناتسياسىندا جەڭىمپاز اتاندى.

2010 -جىلى «بايقوڭىردىڭ اسەم داۋىستارى» حالىقارالىق فەستيۆالىنىڭ I جۇلدە لاۋرەاتى اتاندى. 2012 -جىلى «جاس قانات» رەسپۋبليكالىق جاس ءان ورىنداۋشىلار بايقاۋىنىڭ گران- پري جۇلدەسىنە يە بولىپ، وسى جىلى «ۆوستوچنىي بازار» حالىقارالىق بايقاۋىندا I جۇلدە لاۋرەاتى اتاندى.

2013 -جىلى ديماش قۇدايبەرگەن «مەيكين ازيا» I حالىقارالىق فەستيۆالىنىڭ جەڭىمپازى بولدى. سونىمەن قاتار ۆيتەبسك قالاسىندا وتكەن XXIV حالىقارالىق ەسترادالىق ءان ورىنداۋشىلار «سلاۆيان بازارى-2015» بايقاۋىندا گران-پري جەڭىپ العان. 2015 -جىلى 28-قازان كۇنى ىستانبۇلدا ديماش قۇدايبەرگەن «Abu TV» حالىقارالىق ازيا- تىنىق مۇحيت فەستيۆالىندا قازاقستان رەسپۋبليكاسىنىڭ اتىنان العاش رەت قاتىستى. ول 2014 -جىلى ديماش احمەت جۇبانوۆ اتىنداعى مۋزىكالىق كوللەدجدە اكادەميالىق ءان ورىنداۋ سىنىبىن ءتامامداپ، قازاق ۇلتتىق ونەر ۋنيۆەرسيتەتىنىڭ «ەسترادا ونەرى» فاكۋلتەتىنە ءتۇستى.

ديماش قازاق، اعىلشىن، ورىس، قىتاي، سەرب، يتاليان، فرانسۋز، تاعى باسقا تىلدەردە ءان ورىندايدى. ديماش قۇدايبەرگەنوۆ قىتايدىڭ I am a singer (مەن ءانشىمىن) تەلەبايقاۋىنا قاتىسىپ، سايىستىڭ بارلىق كەزەڭىنەن ءوتىپ ەكىنشى ورىندى جەڭىپ الدى. اتالعان جوبانى قىتايدىڭ ەڭ ءىرى Hunan TV تەلەارناسى كورسەتەدى. 2017 -جىلى ازيانىڭ «گرەمميى» سانالاتىن «Top Chinese Music Award» سىيلىعىن «ازيانىڭ ەڭ تانىمال ءانشىسى» اتالىمىندا جەڭىسكە جەتتى. كوپتەگەن حالىقارالىق جۇلدەلەردىڭ يەگەرى.

اۆتور: اياۋلىم التىنبەك

Basty sózder: قوعام,
Joǵary qaraı