Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Ashat Aımaǵambetov qashyqtan oqytýda artta qalǵan oqýshylarǵa qoldaý kórsetýdi surady

2021 jyldyń 13 maýsym 2021 12:34

NUR-SULTAN. QazAqparat – QR Bilim jáne ǵylym mınıstri Ashat Aımaǵambetov pandemııada oqý baǵdarlamasynan qalyp qoıǵan oqýshylarǵa qoldaý kórsetýdi surady, dep habarlaıdy QazAqparat.

«Qymbatty áriptesim! Mine, barshamyz úshin qıyn ári erekshe bolǵan oqý jyly da óz máresine jetti. Bul oqý jyly aıanbaı qyzmet etken ár muǵalimniń eren eńbegimen jáne erligimen esimizde qalary sózsiz. Mektepterge múldem jańa oqytý ádisterine kóshý ońaıǵa soqpaǵanyn bári birdeı túsine bermeıdi. Ókinishke oraı, biz dástúrli oqytý formatyna tolyqtaı kóshe almadyq. Pandemııanyń saldary bilim berý júıesine áli de áser etetini anyq», - dep jazdy mınıstr Facebook jelisinde.

Bilim mınıstri muǵalimderdiń barlyq qıyndyq pen syn-tegeýrinderge qaramastan, sabaqty utymdy uıymdastyryp, múmkindiginshe jaqsy nátıje kórsete alǵanyn atap ótti.

«Sizder ustaz mamandyǵynyń sezimtaldyq, balalarǵa degen qamqorlyq jáne adamgershilik syndy eń jaqsy qasıetterin tanytýdyń jarqyn úlgisine aınaldyńyzdar. Alaıda, jumsalǵan kúsh-jigerge qaramastan, qashyqtan oqytý kezinde ártúrli sebepterge baılanysty artta qalǵan balalardyń bilimi men basqa oqýshylardyń bilim deńgeıin salystyrǵanda alshaqtyq baıqalady. Bul jaǵdaıdyń oryn alǵanyna balalar kináli me? Árıne, balalardyń esh kinási joq. Olar dástúrli formatta bilim alsa, sizdiń qoldaýyńyzdy sezinip, ózderin kórsete alar edi dep senemin. Olarǵa bul olqylyqtardyń ornyn toltyrý úshin múmkindik berýimiz kerek pe? Álbette. Men, sizdiń áriptesińiz retinde, mamandyǵymyzǵa tán qasıet – izgilikke umtylyp, shákirtterińizge kómek qolyn sozýyńyzdy suraımyn», - dedi A. Aımaǵambetov.

Mınıstr pandemııada oqý baǵdarlamasynan qalyp qoıǵan oqýshylarmen jumys isteýdiń ońaı emestigin jazdy.

«Oqýshylardyń bilimi boıynsha artta qalýy olardyń múmkindikteri sondaı degen sóz emes. Bilim berýdegi olqylyqtardy qıyn jaǵdaı men oqýshylardy jigerlendirý deńgeıiniń jetkiliksizdigimen sıpattaýǵa bolady. Mundaı balalar qazir barlyq nazarymyzdy qajet etedi. Olardyń áleýeti zor. Sondyqtan balalarymyzǵa qoldaý kórsetýimiz kerek. Búldirshinderimizdi óz qamqorlyǵyńyzǵa alyp, qıyndyqtarǵa qaramastan olqylyqtardyń ornyn qosymsha sabaqtar ótkizý arqyly toltyrasyzdar dep úmittenemin. Meniń bul ótinishimdi qabyl alýyńyzdy suraımyn», - deıdi Ashat Aımaǵambetov.

Sonymen birge vedomstvo basshysy muǵalimderdi jazǵy mektepterdiń jumysyna 26 mamyr - 20 maýsym aralyǵynda belsene qatysýǵa shaqyrdy.

«Osy jyly sońǵy qońyraý merekesinde erekshe sezimge bólengenińizdi bilemin. Óıtkeni, bir jaǵynan oqý jyly aıaqtalyp jatsa, ekinshi jaǵynan - jazǵy mektepter jumys isteı bastady. Biz mundaı jaǵdaıdyń qaıtalanbaýy úshin qoldan kelgenniń bárin jasaımyz. Qashyqtan bilim berýde áriptesterim áleýmettik jelilerdi belsendi ári erkin meńgere bastap, óz sabaqtaryna oıyn elementterin engize bastaǵanyn erekshe atap ótkim keledi. Biz, árıne, osyndaı kásipqoı mamandarymyzdy únemi qoldap, olardy basqalar úshin úlgi etemiz. Bul úrdis umytylmaı, kerisinshe, odan da úlken áserge ıe bolady dep úmittenemin», - deıdi Ashat Aımaǵambetov.

Avtor Aıjan Serikjanqyzy
Basty sózder: Koronavırýs, Bilim,
Joǵary qaraı