Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Ashat Aımaǵambetov Prezıdenttiń tapsyrmalary qalaı oryndalyp jatqanyn aıtyp berdi

2021 jyldyń 3 jeltoqsan 2021 15:31

NUR-SULTAN. QazAqparat – QR Bilim jáne ǵylym mınıstri Ashat Aımaǵambetov Memleket basshysynyń Ulttyq qoǵamdyq senim keńesiniń otyrysyndaǵy bilim berýdi damytý jónindegi tapsyrmalary týraly aıtyp berdi, dep habarlaıdy QazAqparat.

«Memleket basshysynyń Ulttyq qoǵamdyq senim keńesiniń otyrysyndaǵy bilim berýdi damytý jónindegi tapsyrmalary týraly aldyńǵy jazbamnyń jalǵasy», dep jazdy Ashat Aımaǵambetov Facebook-tegi paraqshasynda.

Onyń aıtýnysha, júktelgen tapsyrmalar júıeli bolǵandyqtan, qoǵam alǵa qoıylǵan mindetterdiń mańyzdylyǵyn birden túsine bermeıdi. Degenmen, atqarylatyn jumystyń nátıjesin el azamattarynyń basym bóligi sezinedi.

Mınıstr buǵan deıingi jazbasynda bilim berý granttaryn qarjylandyrý júıesindegi ózgeristerge qatysty tapsyrmalar týraly egjeı-tegjeıli aıtyp ótti.

Sońǵy jazbasynda ol basqa da basymdyqtarǵa toqtaldy.

«Basty máselelerdiń biri — bilim berý uıymdary úshin sapaly ınfraqurylym qurý máselesi.

Prezıdent óńir ákimderine 1 myń mektep salý úshin jer ýchaskelerin aldyn ala bólýdi tapsyrdy.

Sondaı-aq turǵyn úı alaptary boı kótergen kezde jańa mektepter ashýdy kózdeıtin normatıvtiń oryndalýyn qamtamasyz etý júkteldi.

Shyn máninde, bul elimizdegi kóptegen iri qalalarǵa tán úlken másele. Áńgime balalar men ata-analarǵa yńǵaıly jaǵdaı jasaý ǵana emes, sonymen birge olardyń qaýipsizdigin qamtamasyz etý tóńireginde bolyp otyr», - dedi Ashat Aımaǵambetov.

Mınıstrdiń aıtýynsha, Qasym-Jomart Toqaev synyptardyń toltyrylýy jónindegi qoldanystaǵy normalardyń buzylýy máselesine basa nazar aýdardy. Sońǵy ýaqytta bul — ózekti suraqtardyń biri.

«Bir jaǵynan, synyptardaǵy shamadan tys tyǵyzdyq máselesi oqýshy oryndarynyń tapshylyǵymen baılanysty májbúrli sheshim bolsa, ekinshi jaǵynan, jergilikti bilim berý bólimderiniń bıýdjet qarajatyn únemdeýge degen umtylysynan týyndaǵan jaǵdaılar anyqtalyp jatyr. Únemdeý maqsatynda qabyldanǵan mundaı sheshim oqý sapasyna teris áser etedi. PISA zertteýiniń nátıjeleri de osynyń aıqyn dáleli», - dedi mınıstr.

Onyń aıtýynsha, Prezıdent sondaı-aq mektepterdiń úlgilik jobasyn ázirleý barysynda ınfraqurylym men materıaldyq bazanyń oqýshylar sanyna sáıkes bolýyna jete kóńil bólýdi tapsyrǵan.

«Bilim alýshylarǵa ashanalardaǵy, oqý kabınetteri men sport zaldaryndaǵy oryndar jetkilikti bolýy tıis. Ókinishke qaraı, bul jobalarǵa jergilikti qurylys basqarmalary tapsyrys beretin bolǵandyqtan, bilim berý úrdisi úshin kóptegen mańyzdy aspektiler eskerilmegeı qalyp otyr.

Ár synypta mektep baǵdarlamasyna sáıkes dene shynyqtyrý sabaǵy aptasyna 3 ret ótkizilýi kerek bolǵan soń, sport zaldarynyń da sany jetkilikti bolýy kerek. Qazir kóptegen mektepte sport zaldary jetispeıdi, sondyqtan muǵalimder sabaqty birneshe synypqa bir ýaqytta ótkizýge májbúr», - dedi ol.

Mınıstr bul mindettiń barlyq materıaldyq-tehnıkalyq bazaǵa qatysty júktelip otyrǵannyn aıtty.

«Prezıdent mektep, kolledj jáne joǵary oqý oryndarynda bilim alýshylardyń qaýipsizdigin qamtamasyz etý máselesine erekshe nazar aýdardy.

Ol úshin bilim berý uıymdaryndaǵy qaýipsizdik júıelerine biryńǵaı talaptar ázirleýdi tapsyrdy. Onyń ishinde, bilim berý uıymdary 3 jylǵa kelisimshartqa otyryp, mamandandyrylǵan kúzet qyzmetimen qamtamasyz etilýi qajet.

Bıyldan bastap iri mektepter, kolledjder men joǵary oqý oryndary mamandandyrylǵan kúzet agenttikteriniń qyzmetterin paıdalana bastady. Bul rette júrgiziletin memlekettik satyp alý rásimderiniń nátıjesi tek 1 jylǵa deıin ǵana jaramdy bolatynyn eskeretin bolsaq, bilim berý uıymdary úshin bul ózekti problemaǵa aınaldy», - dedi Ashat Aımaǵambetov.

Onyń pikirinshe, konkýrs boıynsha rásimderdiń ótkizilýi men qorytyndysynyń shyǵarylýyna, keı jaǵdaıda shyǵarylǵan sheshimge shaǵymdanýǵa kóp ýaqyt ketedi, tipti kúntizbelik jyl aıaqtalyp ta jatady. «Qaýipsizdik agenttigi úshin de, mektep úshin de birneshe aıǵa ǵana kelisimshartqa otyrý tıimsiz jáne qajet emes. Sonymen qatar bilim berý uıymdarynyń ereksheligin eskersek, kúzetshilerdiń únemi aýysyp turýy balalarmen jumys isteý barysynda keri áser etedi.

Sondyqtan aldaǵy ýaqytta kelisimsharttar 3 jyl merzimge jasalatyn bolady. Sondaı-aq biz osyndaı satyp alý rásimderine erekshe jaǵdaılar jasaý boıynsha bastama kóteretin bolamyz», - dedi Ashat Aımaǵambetov.

Sondaı-aq, Memleket basshysy balalardyń bos ýaqytyn paıdaly ótkizýine jáne qosymsha bilim alýyna jaǵdaı jasaý máselelerine jeke toqtalǵan.

«Úkimetke oqýshylar saraıyn, mýzyka mektepterin, memlekettik balabaqshalar men qosymsha bilim berý uıymdaryn jekemenshik sektorǵa berýge shekteý qoıýdy tapsyrdy.

Atalǵan máseleni júıeli túrde sheshý maqsatynda Prezıdent tapsyrmasy aıasynda mýzyka jáne kórkemsýret mektepteri, oqýshy saraılary memleket menshiginde qalyp, balalardyń ıgiligi úshin qyzmet etetin bolady», - dedi mınıstr.

Ashat Aımaǵambetov Memleket basshysynyń barlyq tapsyrmalary jalpy bilim salasynyń júıeli túrde damýyna jáne balalardyń quqyqtary men múddelerin qorǵaýǵa baǵyttalǵandyǵyn taǵy da atap ótti.

Mınıstr óz tarapymynn qoıylǵan mindetterdi oryndaý úshin qajetti jumystar júrgiziletinin málimdedi.


Joǵary qaraı