Aýa raıy
Astana 9 °S
Almaty 2 °S
valıýta baǵamy
USD 421.58
EUR 496.83
RUB 5.53
CNY 62.20

Asqar Mamın Qyzylorda oblysynyń damý máseleleri jóninde keńes ótkizdi

2020 jyldyń 28 shilde 2020 19:38

NUR-SULTAN. QazAqparat - QR Premer-Mınıstri Asqar Mamın Qyzylorda oblysynyń damý máseleleri jóninde keńes ótkizdi, dep habarlaıdy QazAqparat QR Úkimetiniń resmı saıtyna silteme jasap.

Óńirdiń áleýmettik-ekonomıkalyq damýnyń ózekti máselelerin sheshý úshin usynystar ázirleý boıynsha ortalyq memlekettik organdar men Qyzylorda oblysynyń ákimdigi atqarǵan jumystar týraly QR Premer-Mınıstriniń birinshi orynbasary Á. Smaıylov pen oblys ákimi G. Ábdiqalyqova baıandady.

Ulttyq ekonomıka mınıstri R. Dálenov, Indýstrııa jáne ınfraqurylymdyq damý mınıstri B. Atamqulov, Densaýlyq saqtaý mınıstri A. Tsoı jáne basqa da ortalyq memlekettik organdardyń basshylary túsinik berdi.

Qyzylorda oblysyn damytý máseleleri jónindegi jumys toby 100 mlrd teńgege 79 jobaǵa qoldaý bildirdi. Bıyl óńirde 15,6 mlrd teńgege 42 jobany qarjylandyrý josparlanǵan. Jobalar tizimi Qyzylorda sý torabyn qaıta jóndeýdi bastaýdy, Qyzylorda, Aral qalalaryndaǵy jáne Tereńózek kentindegi sýmen jáne elektrmen jabdyqtaý júıelerin damytýdy, «BJK – 2025» aıasynda jas kásipkerlerge memlekettik grant berýdi jáne shaǵyn nesıelendirýdi arttyrýdy, Qyzylorda qalasyndaǵy jańa magıstraldy kósheniń qurylysyn jalǵastyrýdy qamtıdy.

Bilim jáne ǵylym mınıstrligi halyqtyń áleýmettik osal toptaryna jatatyn otbasylardan shyqqan oqýshylardy kompıýterlik tehnıkamen qamtamasyz etý aıasynda Úkimet rezervi esebinen oblystyń 34,7 myń oqýshysy úshin kompıýterlik tehnıka (kompıýterler, noýtbýkter, planshetter jáne modemder) satyp alýdy kózdep otyr.

2021 jyly 32 jobany iske asyrýdy bastaý josparlanyp otyr. Onyń ishinde Aqbasty, Toqabaı, Abaı, Tóretam, Janqoja batyr, Maıdakól eldimekenderin jáne Baıqońyr qalasyn sýmen jabdyqtaý júıelerin damytý, Kókaral bógetin, Kúmisketken jáne Qaraózek sý qoımalaryn jańǵyrtý, sondaı-aq ırrıgatsııalyq júıelerdi jetildirý, Jalaǵash kentinde gaz qubyryn jáne oramishilik gaz jelilerin salý, turǵyn úı jáne tıisti ınjenerlik-kommýnıkatsııalyq ınfraqurylym salý, sonyń ishinde Baıqońyr q. bes 50 páterli turǵyn úı salý jáne t. b.

Atalǵan sharalar óńirdi odan ári damytý úshin eleýli áleýmettik-ekonomıkalyq nátıje beredi dep kútilýde. Onyń ishinde negizgi kapıtalǵa salynǵan ınvestıtsııalardyń ósimi jáne jańa jumys oryndaryn qurý.


Joǵary qaraı