Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Asqar Mamın jergilikti qamtý jumysyna bıznesti keńinen tartýdy tapsyrdy

2021 jyldyń 23 qarasha 2021 10:27

NUR-SULTAN. QazAqparat – Úkimet basshysy Asqar Mamın elimizde jergilikti qamtý jumysyn kúsheıtip, onyń qyzmetine bıznes ókilderin keńinen tartýdy tapsyrdy, dep habarlaıdy QazAqparat tilshisi.

«Jergilikti qamtýdy damytý ákimderdiń negizgi mindetteriniń biri ekenin taǵy da atap ótkim keledi, olardyń jumysy osy mindet boıynsha baǵalanady. Osyǵan baılanysty mynalarǵa nazar aýdarǵym keledi. Birinshiden, ákimdikter jergilikti qamtýdy baqylaý jónindegi óńirlik komıssııalardyń jumysyn kúsheıtip, onyń qyzmetine jergilikti bıznesti barynsha tartýy kerek. Ekinshiden, jer qoınaýyn paıdalanýshylardyń satyp alýy – bul da otandyq óndirýshilerdi damytý men qoldaý úshin áleýeti zor iri alań», - dedi Asqar Mamın Úkimet otyrysynda.

Sondaı-aq, Premer-Mınıstr jergilikti qamtýdy damytýǵa qatysty mınıstrler men quzyrly vedomstvo basshylaryna da birqatar mindet júktedi.

«Indýstrııa jáne ınfraqurylymdyq damý, Energetıka mınıstrlikterine, «Samuryq-Qazyna» qoryna jer qoınaýyn paıdalanýshylarmen erikti kelisimder jasasýdy qamtamasyz etýdi tapsyramyn. Úshinshiden, Indýstrııa jáne ınfraqurylymdyq damý mınıstrligi Energetıka mınıstrligimen, Ulttyq kásipkerler palatasymen birlesip, jer qoınaýyn paıdalanýshylardyń otandyq taýar óndirýshilermen offteık-sharttar jasasýynyń barlyq qajetti máselelerin pysyqtaýdy tapsyramyn», - deıdi ol.

Atalǵan jumystyń iske asýyna Úkimet basshysynyń orynbasary Roman Sklıar jaýapty bolady.

Aıta keteıik, buǵan deıin Úkimet basshysy jergilikti qamtýdyń ósý qarqyny 6,4 paıyzdy quraǵanyn málim etti.


Joǵary qaraı