Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

«Astana Opera» teatrynyń Kameralyq zalyna Kúlásh Baıseıitovanyń esimi beriledi

2021 jyldyń 14 qyrkúıek 2021 01:58

NUR-SULTAN. QazAqparat - «Astana Opera» Kameralyq zaly áıgili ánshi Kúlásh Baıseıitovanyń esimimen atalatyn bolady, dep habarlaıdy teatrdyń baspasóz qyzmeti.

Osynaý ataýly kúnniń qurmetine oraı 13 qyrkúıekte «Qazaqtyń bulbuly» kontserti ótedi.

«Búgingi tańda «Astana Opera» Kameralyq zaly – kóptegen mýzykanttar óner kórsetýge umtylatyn elimizdiń bedeldi kontserttik alańy. Bul zal klassıkalyq murany saqtap, jańaryp otyratyn qazaqstandyq qoǵamnyń rýhanı suranystaryn qanaǵattandyratyn qazaq jáne álemdik mýzyka mádenıeti dástúrlerin tasymaldaýshy. Atalmysh sahnada Qazaqstannyń ǵana emes, dúnıejúziniń áıgili ártisteri óz ónerlerin pash etken, qazir de óner kórsetip júr. Kameralyq zaldyń budan keıin Kúlásh Baıseıitova zaly bop atalýy biz úshin zor qurmet. Ol «KSRO halyq ártisi» joǵary ataǵynyń alǵashqy ıegerleriniń jáne sol ataqty jas kezinde alǵan tulǵalardyń biri. Onyń tabıǵı mýzykalyq daryny men álemdik mýzykanyń asyl qazynasyna qaldyrǵan muralary bizdiń jadymyzda. Ol somdaǵan Shuǵanyń beınesi ánshiniń sheberlik turǵydan óskenin kórsetti, al E.G.Brýsılovskııdiń «Qyz-Jibek» operasyndaǵy Jibektiń partııasy ánshige klassıkalyq opera óneriniń shyńyna kóterilýge jol ashty», - dedi Qazaqstannyń eńbek sińirgen qaıratkeri, «Astana Opera» dırektory Ǵalym Ahmedıarov.

«Budan bólek, kóptegen ártisterimiz Kúlásh Baıseıitova atyndaǵy Ulttyq opera jáne balet teatrynda jumys istep, kórnekti ánshige degen mahabbaty men qurmetin saqtap, ózderimen «Astana Operaǵa» tamasha operalyq dástúrlerdi ala keldi. Asqaq ónerge oryndaýshylyq ónerdiń juldyzdaryna aınalǵan on myńdaǵan túlek syılaǵan tamasha mýzyka mektebi jumys isteıtin Almaty qalasymen qatar, endi qalamyzda Kúlásh Baıseıitovanyń esimi qaıta jańǵyratyny qýantady», - dep sózin qorytyndylady teatr dırektory.




Osy mańyzdy oqıǵa qarsańynda Kúlásh Baıseıitovanyń qyzy – Qarlyǵash Baıseıitova óziniń balalyq shaǵy týraly jyly estelikteri týraly aıtty, óziniń meıirimdi jáne qamqor anasynyń arqasynda qandaı baqytty bolǵany týraly kóp áńgimeledi. Ol elordanyń mádenı ómiri úshin «Astana Opera» Kameralyq zalynyń aty ańyzǵa aınalǵan tulǵa – Kúlásh Baıseıitovanyń esimimen atalýy úlken qýanysh ekenin atap ótti.




Qyzy anasynyń alǵys hattarynyń birneshe kóshirmesin, sondaı-aq áıgili ánshiniń jeke muraǵatynan alynǵan fotosýretti teatrdyń art-galereıasyna tapsyrdy. 13 qyrkúıekte teatr foıesinde aıtýly oqıǵaǵa oraı kórme ótedi.

«Kúlásh Baıseıitova atyndaǵy Kameralyq zal sahnasynda óner kórsetetin barlyq ártisterge tabys tileımin, premeralar men kontsertter odan da kóp bolsyn dep tilegim keledi, – dedi Qarlyǵash Baıseıitova.


Basty sózder: Mádenıet, Óner, Nur-Sultan,
Joǵary qaraı