Aýa raıy
Astana -25 °S
Almaty -7 °S
valıýta baǵamy
USD 421.58
EUR 496.83
RUB 5.53
CNY 62.20

«Astana Pro Tım» shabandozy halyqaralyq týrnırde úshinshi keldi

2020 jyldyń 4 tamyz 2020 02:04

NUR-SULTAN. QazAqparat – Qazaqstandyq «Astana Pro Tım» komandasynyń shabandozy Aleksandr Vlasov «Oksıtanııa týrynda» erekshe óner kórsetti. Reseı chempıony atanǵan «Astana Pro Tım» shabandozy «Týr de Franstyń» qazirgi jeńimpazy Egan Bernal men Pavel Sıvakovty alǵa ozdyryp, máreni úshinshi qıdy, dep habarlaıdy QazAqparat.

«Bul óte mańyzdy, sonymen qatar óte kúrdeli kezeń boldy. Biz sońǵy órdi óte jyldam basyp óttik. Ineos komandasy jyldamdyqty barynsha údetkendikten, olarǵa ilesý ońaıǵa túsken joq. Biraq qarqyndy júristen jańylmadyq. Olardyń izinen shamam jetkenshe qalmaýǵa barymdy saldym. Jalpy meniń komandamdaǵy joldastarym búgin maǵan úlken kómek kórsetti. Bul karantınnen keıingi alǵashqy saıysym. Búgingi jetistigim men úzdik úshtikke ilingenim úshin qýanyshtymyn», - deıdi Aleksandr Vlasov.

Oksıtanııa týrynyń úshinshi kezeńiniń baǵdary kúrdeliligi birinshi sanattaǵy úsh birdeı órleýden turady. Sent-Godenadan bastalǵan jarys Kol de Beıred shyńyndy túıindeldi. Saıystyń alǵashqy shaqyrymynda-aq shabandozdardyń arasy edáýir ajyrap, kolýmbııalyq shabandoz Harold Tehada osy topta «Astana Pro Tım» komandasyn jeńiske jeteledi. Tehada saıysta kópke ese jibermeı, kún boıy belsendilik tanytty.

«Meniń búgingi josparym – ozý bolatyn. Kerekti topqa tap boldym. Kúnim sátti ótken sekildi. Qara úzip ketý jospary boıynsha barymdy saldym. Aldaǵy kúnderde, aptalarda óz ónerimdi shyńdaı tússem deımin», - deıdi Harold Tehada.

Jarystyń sheshýshi kezeńi shyńǵa birneshe shaqyrym qalǵan kezde qyza tústi. Toptan Egan Bernal, Pavel Sıvakov, Aleksandr Vlasov pen Tıbo Pıno ozyp shyqqan edi. Aqyry qosarlaı jasalǵan shabýyldyń arqasynda Bernal birinshi bolyp kelip, jalpy eseptiń jańa kóshbasshysy atandy. Al Vlasov úshinshi bolyp keldi.

Oksıtanııa týrynyń tórtinshi kezeńi erteń ótedi: shabandozdardy qysqa da tik órlerden turatyn 195 shaqyrymdyq kúrdeli saıys kútip tur.


Avtor Aıan Bekenuly
Basty sózder: Sport,
Joǵary qaraı