Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

«Astana» sý qoımasyna bıyl qansha sý jınaldy

2021 jyldyń 7 sáýir 2021 12:37

NUR-SULTAN. QazAqparat –Elorda aýmaǵyndaǵy sý basý qaýpi bar ýchaskelerdiń sany azaıyp keledi. Muny mamandar byltyr qabyldanǵan keshendi jospardyń jemisti iske asýymen baılanystyrady, dep habarlaıdy QazAqparat tilshisi.

Nur-Sultan otyn-energetıka kesheni jáne kommýnaldyq sharýashylyq basqarmasy basshysynyń orynbasary Erlan Syzdyqov byltyr qala aýmaǵynda 37 qaýipti ýchaske bolǵanyn aıtady.

«2021 jyly qar sýyn aǵyzýdyń keshendi jospary jasaldy. Jospar boıynsha sý basý yqtımaldyǵy bar ýchaskelerdiń tolyq tizimi daıyndaldy. Olardyń jalpy sany – 29. Almaty aýdany boıynsha 7, Baıqońyr aýdany boıynsha 8, Esil aýdany boıynsha 9, Saryarqa aýdany boıynsha 5 ýchaske bar. 2019 jáne 2020 jyldarmen salystyrǵanda sý basý qaýpi ýchaskelerdiń sany 8-ge azaıdy», - dedi basqarma ókili.

Erlan Syzdyqov kommýnaldyq sharýashylyqqa jaýapty qyzmetter tasqynǵa daıyndyqty byltyr qazan aıynan beri bastap ketkenderin aıtady. Sol daıyndyq barysynda Ilnka, Óndiris, Kóktal-1, Kóktal-2, Temirjol, Prıgorod, Ońtústik-shyǵys sııaqty turǵyn úı massıvteriniń bári nazarǵa alynǵan.

«Tizimdegi 29 ýchaskede azamattyq qorǵanys organdarynyń jedel toptary tolyq daıyndyq rejımine kóshirildi. Sondaı-aq, kommýnaldyq qyzmetten 190 adam tartyldy.183 tehnıka, 29 órt sóndirý sorǵysy daıyn tur. 1 sáýirdegi jaǵdaı boıynsha qala aýmaǵynan 7 mln tekshe metr qar shyǵarylyp, 178 myń tekshe metr qar sýy sorǵytyldy», - deıdi maman.

Basqarma ókili «Astana» sý qoımasynan qalaǵa keler qaýip joq ekenin de atap ótti.

«Astana» sý qoımasy men qalany qar sýynan qorǵap turǵan nysandardaǵy sýdyń kólemi kún saıyn tekserilip otyr. «Astana» sý qoımasyndaǵy sýdyń kólemi qazir 289 mln tekshe metrge teń. Bul onyń jobalyq qýatynyń 69 paıyzy degen sóz. Qarymta rettegishke sý jınalmaǵan.Esil ózeni men Sarybulaq bastaýynyń, Maıbalyq ózeninen Nur-Esil arnasyna deıingi sý qaıtarý kanalynyń jaǵasyn bekemdep, arnasyn tereńdetý jumystary jalǵasýda», - dedi Erlan Syzdyqov.


Avtor Esimjan Naqtybaı
Basty sózder: Nurly jol, Sý tasqyny,
Joǵary qaraı