Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Astanada er adam sot oryndaýshysyna balta ala júgirdi

2021 jyldyń 26 qazan 2021 18:10

NUR-SULTAN. QazAqparat – Elordada boryshker jeke sot oryndaýshysyna balta ala júgirip, qoqan-loqy kórsetken. Bul jaıynda Nur-Sultan qalalyq jeke sot oryndaýshylary óńirlik palatasynan málim etti, dep habarlaıdy QazAqparat tilshisi.

Óńirlik palata málimetinshe, elordanyń jeke sot oryndaýshysy ózine N. esimdi boryshkerdiń atqarýshylyq qujattardy oryndaý barysynda shabýyl jasap, ómirine qaýip-qater tóndirgenin aıtyp, ony jaýapkershilikke tartý úshin polıtsııa basqarmasyna shaǵym túsirgen. Nur-Sultan qalasynyń jeke sot oryndaýshysy T.-nyń óndirisinde boryshker N. esimde azamattan jalpy somasy 196 545 teńge jáne bank paıdasyna 358 728 teńge óndirip alý týraly 17 ákimshilik aıyppulǵa qatysty atqarýshylyq qujat bar.

«Jeke sot oryndaýshysy atqarýshylyq qujatty oryndaý úshin barlyq is-sharany qabyldap, boryshkerge qatysty buǵattaý jáne shekteý sharalaryn júrgizdi. Ol 2020 jyldyń qazanynan mindettemelerin oryndaýdan bas tartyp júr. Atqarýshylyq qujatty oryndaý maqsatynda «Vaz 2115» markaly avtokólikti tárkileý týraly qaýly shyǵaryldy. 26 qazan kúni jergilikti ýaqytpen saǵat 08.45-te sot oryndaýshysy boryshkerdiń turǵylyqty jerine baryp, jol boıynda turǵan kóligin tapqan», - dedi Nur-Sultan qalalyq jeke sot oryndaýshylary óńirlik palatasy basshysynyń orynbasary Madına Janasaeva.

Polıtsııa qyzmetkerleriniń qatysýymen kólikti tárkileý barysynda boryshker ózin dóreki ustap, jeke sot oryndaýshysynyń kólikti óz erkimen berý talabyn múldem elemegen.

«Osydan keıin ol úıine kirip, balta alyp shyqty jáne jeke sot oryndaýshylary men polıtsııa qyzmetkerlerine shabýyl jasady. Bul sát vıdeoǵa jazylǵan. Osy ýaqytta polıtsııa qyzmetkerleri ýytty gaz ballonyn shashyp, ony basqarmaǵa alyp ketti», - dedi M.Janasaeva.

Aıta keterligi, taǵy 4 jeke sot oryndaýshysynda boryshkerden jalpy somasy 105 631,54 teńgeni quraıtyn memleket kirisine aıyppuldar men salyqtyq bereshekti óndirip alýǵa qatysty qujat bar.


Joǵary qaraı