Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Astanada qudyqqa qulap kóz jumǵan 13 jasar oqýshy: Arada eki jyl ótkende sot úkimi shyqty

2021 jyldyń 5 tamyz 2021 12:35

NUR-SULTAN. QazAqparat – Nur-Sultan qalasy Almaty aýdanynyń №2 aýdandyq soty «Astana sý arnasy» ShJQ MKK káriz qyzmetiniń basshysy V.V. Vlasenkoǵa «abaısyzda qazaǵa ushyratý baby» boıynsha aıyptaý úkimin jarııalady, dep habarlaıdy QazAqparat sottyń baspasóz qyzmetine siltememen.

Sot 2019 jyldyń 16 aqpanynda Jeleznodorojnyı kenti Gorkıı kóshesi, 22 mekenjaıynda «Astana sý arnasy» ShJQ MKK qaramaǵyndaǵy «1100 oryndyq mektep» nysanynyń káriz qudyǵynyń qaqpaǵy jabylmaǵanyn anyqtady.

Osynyń saldarynan ashyq qudyqqa qulap ketken B.Sh. Ómirhan qaza tapqan edi.

Keıinnen osy iske qatysy bar birqatar jaýapty tulǵalarǵa sógis jarııalandy .

«Sot Qylmystyq is júrgizý kodeksiniń 170-baby 1-bóligi, 3-tarmaǵy negizinde azamattyq talapkerdiń aryzyn qanaǵattandyrý jáne onyń mólsheri máselesin sottyń azamattyq sot isin júrgizý tártibimen qaraýyna berýdi uıǵardy. Bul rette sot jábirlenýshiniń moraldyq zııandy óteý týraly talap-aryzyn ishinara qanaǵattandyryp, jábirlenýshi P. A. Chınıkbaevanyń paıdasyna sottalýshy V. V. Vlasenkodan 4 000 000 teńge óndirdi. «Astana sý Arnasy» ShJQ MKK azamattyq jaýapkerinen buryn qaıtys bolǵan bala otbasyna erikti túrde 2 300 000 teńge materıaldyq kómek kórsetkenin nazarǵa ala otyryp, 6 000 000 teńge tólem júkteldi. Sotqa deıingi is júrgizý barysynda jábirlenýshi P.A. Chınıkbaeva azamattyq jaýapkerdiń turǵyn úımen jáne jumys ornymen qamtamasyz etý usynysynan bas tartqanyn atap ótken jón», - delingen sot habarlamasynda.

Sot úkimimen V. V. Vlasenko kináli dep tanyldy, biraq is merziminiń ótýine baılanysty jazadan bosatyldy.

Úkim zańdy kúshine engen joq.


Avtor Aıjan Serikjanqyzy
Basty sózder: Zań, Sot, Nur-Sultan, Oqıǵa,
Joǵary qaraı