Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Atamekendi aıalaý azamattyq paryzymyz - Qaırat Balabıev

2022 jyldyń 19 qańtar 2022 18:10

TÚRKІSTAN. QazAqparat - Prezıdentimiz Qasym-Jomart Toqaev Parlament Májilisinde elimizde oryn alǵan qaqtyǵys saldarynan týyndaǵan qıyndyqtardy eńserý joldary men halyqtyń áleýmettik jaǵdaıyn jaqsartý máselelerin jáne olardy sheshýdiń baǵyt-baǵdaryn aıqyndap berdi, - deıdi Túrkistan oblystyq máslıhatynyń hatshysy Qaırat Balabıev.

«El ekonomıkasyn ártaraptandyrý, óńdeý ónerkásibin damytý, quqyq qorǵaý júıesin túbegeıli reformalaý, qarjy naryǵyn retteý jáne aýyl sharýashylyǵy, bilim, densaýlyq saqtaý, áleýmettik salalardyń tıimdiligin arttyrý boıynsha Prezıdent kótergen máselelerdiń barlyǵy – halyqtyń kókireginde júrgen saýaldar. Ásirese, Memleket basshysynyń «Qazaqstan halqyna» qoǵamdyq-áleýmettik qoryn qurý týraly bastamasy kópshiliktiń kóńilinen shyqty desek te bolady. Bul qor az qamtylǵan, turmys deńgeıi tómen jáne sırek aýyratyn balalardy ósirip otyrǵan otbasylarǵa áleýmettik qoldaý kórsetý boıynsha naqty máselelerdi sheshýmen aınalysatyn bolady» – deıdi ol.

Sondaı-aq, elimizde ýtılızatsııalyq alym jınaý sharýasymen aınalysyp kelgen biryńǵaı operatordyń jumysy toqtatyldy. Endigi ýaqytta ýtılızatsııalyq alymdy jınaý shet elder sekildi memleket qaraýyna ótip, otandyq mashına jasaýshylarǵa qoldaý kórsetiledi. Ýtılızatsııalyq alymnan túsken qarjy qoǵamǵa tıimdi jaratylatyn bolady, dep esepteıdi Qaırat Rahymuly.

Sonymen qatar, Prezıdentimizdiń «Samuryq-Qazyna» qorynyń qyzmetin tolyǵymen transformatsııalaý jónindegi tapsyrmasy pysyqtalyp jatqany da oń ózgeristerge bastaıtyn qadam ekendigin jetkizdi. Atap aıtqanda, eń aldymen, «Samuryq-Qazyna» qorynyń tym kóp basqarý qurylymdaryn qysqartý, memleket pen halyq múddesine baǵyttalǵan tabystardy arttyrý úshin «Samuryq-Qazyna» men Úkimet arasyndaǵy ózara qatynastardyń sıpatyn ózgertý, resýrstardy el ıgiligine baǵyttaý, ulttyq kompanııalardyń satyp alý júıeleriniń ashyqtyǵyn qamtamasyz etý jáne qordyń aktıvterin jekeshelendirý isterin jandandyrý boıynsha búginde Úkimet naqty usynystar men júzege asyrylatyn sharalardy ázirleýde.

«Qazaqstan – bizdiń ortaq elimiz! Sondyqtan da elimizge aıanbaı eńbek etip, táýelsizdigimizdi kózdiń qarashyǵyndaı qorǵaýdyń qajettiligin birde-bir sát esten shyǵarmaýymyz qajet. «Birligi bar eldiń belin eshkim syndyrmas» - dep, dana babalarymyz aıtqandaı, jerimizden qut-bereke qashpaı, táýelsiz Qazaqstannyń aspany máńgi beıbit bolýy úshin birligimizdi myǵymdap, elimizdiń damýyna bar kúsh-jigerimizdi salaıyq»-deıdi ol.


Avtor Qaırat Zaınıshev
Basty sózder: Túrkistan oblysy, Qoǵam,
Joǵary qaraı