Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Atyraý oblysynda esirtkini jarnamalaǵan 17 saıt buǵattaldy

2022 jyldyń 11 qańtar 2022 21:43

ATYRAÝ. QazAqparat – Atyraý oblysynda esirtkini jarnamalaǵan 17 saıt buǵattaldy, dep habarlaıdy QazAqparat.

Bul týraly Atyraý oblysynyń ákimi Mahambet Dosmuhambetovtiń tóraǵalyǵymen ótken nashaqorlyqqa jáne esirtki bıznesine qarsy is-qımylǵa baǵyttalǵan qyzmetti úılestirý jónindegi óńirlik vedomstvoaralyq shtab otyrysynda belgili boldy.

Oblystyq polıtsııa departamenti bastyǵynyń orynbasary Nurhat Orazbaevtyń málimetinshe, taldaý málimetterine sáıkes, esirtkimen baılanysty qylmystardyń sany ósken.

«Qazirgi tańda esirtki quraldary men psıhotproptyq zattardyń sany 350-den astam. Tutynýshylardyń basym bóligin jastar kontıngenti. Quqyq qorǵaý organdary úshin bul úlken problemalyq máselege aınalyp otyr. Esirtki saýdasy men alaıaqtyq qylmystarynyń basym bóligi ǵalamtor arqyly jasalady», - deıdi Nurhat Orazbaev.

Onyń deregine súıensek, byltyr oblysta 127 qylmys tirkelip, zańsyz aınalymnan 20 kelige jýyq esirtki tárkilengen. Qazir oblystyq narkologııalyq dıspanserde 509 adam esepke alynǵan. Onyń ishinde 22 áıel adam, 1 kámeletke tolmaǵan bala bar. Sıntetıkalyq esirtkini satýmen aınalysqan 27 tulǵa anyqtalǵan.

«Іshki ister mınıstriniń nusqaýyna sáıkes, ǵalamtor jelisinde jańa psıhobelsendi zattardy jáne sıntetıkalyq jolmen alynǵan esirtkilerdi izdestirý is-sharalary júrgizildi. Ǵalamtor jelisinde esirtkini jarnamalaıtyn 17 saıt anyqtalyp, buǵattaldy. Sondaı-aq, 7 esirtki alqaby joıyldy. Qyzmettik ıtterdiń kómegimen 366 qylmys ashyldy. Onyń ishinde 156 urlyq, 11 tonaý, 3 qaraqshylyq, 28 esirtkige qatysty qylmystar bar», -dedi ol.

Oblys ákimi Mahambet Dosmuhambetov jaýapty tulǵalarǵa nashaqorlyqpen kúresti mektepten bastap, jastar arasynda túsindirý jumystaryn kúsheıtýdi tapsyrdy.

«Memlekettik organdarǵa, ásirese oblystyq basqarmalarǵa nashaqorlyq profılaktıkasyna qajetti qarjyny aldyn ala josparlaýdy tapsyramyn. Densaýlyq saqtaý mınıstrligimen esirtkiniń sıntetıkalyq jáne ózge jańa túrlerin anyqtaıtyn ekspress zertteý quraldarymen qamtamasyz etý máselesin kelisý qajet. Psıhıkalyq densaýlyq ortalyǵy nashaqorlyqqa qatysty eseptiń únemi jańartylýyn qamtamasyz etip, monıtorıng júrgizý kerek. Nashaqorlyqpen esepte turǵan adamdardy baqylaý, emdeý men saýyqtyrýǵa erekshe nazar aýdarǵan jón», -dedi Mahambet Dosmuhambetov.

Byltyr esirtkige erte jastan táýeldi bolýdyń aldyn alý jáne jasóspirimder arasynda esirtki qylmystaryn boldyrmaý úshin 580 is-shara ótkizilgen.

Eske sala ketelik, budan buryn Atyraý oblysynyń turǵyndarynan Call ortalyqqa 300 myńnan astam qońyraý túskenin jazǵan bolatynbyz.


Joǵary qaraı