Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Atyraý oblysynda polıtsııanyń servıstik modeli engizildi

2022 jyldyń 25 mamyr 2022 02:51

ATYRAÝ. QazAqparat – Atyraý oblysynda polıtsııanyń servıstik modeli engizildi, dep habarlaıdy QazAqparat.

Oblys ákimi Serik Shápkenov ótkizgen jıynda qylmystyń, onyń ishinde ınternet-alaıaqtyqtyń aldyn alý, «Polıtsııanyń servıstik modeli» pılottyq jobasyn engizý máseleleri qaraldy.

Oblystyq polıtsııa departamentiniń bastyǵy Nurhat Orazbaevtyń málimetinshe, jyl basynan beri tirkelgen qylmystyq quqyqbuzýshylyq sany 4,1%-ǵa, al, qylmystar 4,4%-ǵa tómendegen.

«Alaıaqtyqqa qarsy is-qımyldy jandandyrý baǵytynda birqatar jedel-profılaktıkalyq is-sharalar júrgizildi. Sonyń nátıjesinde oblys kóleminde tirkelgen alaıaqtyq qylmystyń sany 28,8 paıyzǵa tómendedi. Sońǵy jyldary zamanaýı tehnıkalyq quraldarymen ǵalamtordaǵy alaıaqtyq qylmysy keńinen taraldy. Ǵalamtor arqyly jasalǵan alaıaqtyq qylmystyń úlesi 44,3 paıyzdy qurap otyr. Bıylǵy 25-27 sáýir aralyǵynda oblys aýmaǵynda aqparattandyrý jáne baılanys salasyndaǵy qylmystardyń jolyn kesý, ashý maqsatynda «Kontrafakt» jedel-profılaktıkalyq is-sharasy ótkizildi. Atalǵan is-shara kezinde 15 alaıaqtyq qylmysy ashyldy», -deıdi Nurhat Orazbaev.

Departament basshysynyń orynbasary Berik Amangeldiniń aıtýynsha, «Polıtsııanyń servıstik modeli» pılottyq jobasyn engizýdiń úsh negizgi baǵyty aıqyndalyp otyr.

«Birinshisi – azamattardyń polıtsııaǵa qoljetimdiligin barynsha jeńildetýge baǵyttalǵan qadam. Ekinshi basty baǵyt – qaýipsizdikti qamtamasyz etý jáne quqyq buzýshylyqtardyń aldyn alý. Úshinshiden, bul – turǵyndarmen tyǵyz baılanys. Sebebi qaýipsizdikti qamtamasyz etý problemalary, kóbinese, jergilikti mańyzǵa ıe. Ony tıimdi sheshý jergilikti qoǵamdastyqtyń belsendi qoldaýymen ǵana múmkin bolady. Osy baǵytta ýchaskelik polıtsııa ınspektorlary turǵyndarmen júıeli túrde kezdesýler ótkizedi», -dedi Berik Amangeldi.

Oblys ákimi Serik Shápkenovtiń pikirinshe, polıtsııanyń servıstik modeli jobasy turǵyndar qaýipsizdigi men quqyq buzýshylyqtyń aldyn alýǵa baǵyttalýy kerek.

«Turǵyndar tarapynan túsken ótinish, ózge de máseleler ýaqytyly sheshilýi tıis. Bul – atalǵan jobanyń basty baǵyty. Qazir jobaǵa qatysty arnaıy jumys toby quryldy. Negizgi baǵyttar boıynsha naqty jumystardy qolǵa alyp, qaýipsizdikti kúsheıtý qajet. Turǵyndarmen tikeleı baılanysty kúsheıtip, turǵyndardyń qaýipsizdigin qamtamasyz etetin jergilikti polıtsııa qyzmetiniń jumysyn jańǵyrtýdy jalǵastyrý kerek. Ásirese, jaıaý júrginshiler men bilim berý mekemelerindegi qaýipsizdik máselesine basa kóńil bólgen jón», -dedi oblys ákimi.

Eske sala ketelik, budan buryn Atyraý oblysynda jol erejesin baqylaıtyn mobıldi qosymsha iske qosylǵanyn jazǵan bolatynbyz.

Avtor Bek Mustafa
Basty sózder: Atyraý oblysy, Polıtsııa,
Joǵary qaraı