Aýa raıy
Nýr-Sýltan +7 °S
Almaty +14 °S
valıýta baǵamy
USD 449.85
EUR 485.43
RUB 5.71
CNY 70.69

Atyraý polıtseıleri brakonerlerden 500 keliden astam bekire tárkiledi

2022 jyldyń 16 mamyr 2022 19:41

ATYRAÝ. QazAqparat – Atyraý polıtseıleri «Bekire – 2022» balyq qorǵaý aktsııasy kezinde brakonerlerden 500 keliden astam bekire tárkiledi, dep habarlaıdy QazAqparat tilshisi.

Oblystyq polıtsııa departamentiniń bastyǵy, polıtsııa polkovnıgi Nurhat Orazbaevtyń málimetinshe, tártip saqshylary 1 sáýirden beri 1 tonna balyq tárkilegen. Onyń ishinde 500 keliden astam bekire bar.

​«Bıylǵy 1 sáýirde Jaıyq-Kaspıı basseıniniń sý aıdyndarynda «Bekire – 2022» keń aýqymdy balyq qorǵaý is-sharasy ótip jatyr. Atalǵan is-shara quqyq, tabıǵat qorǵaý organdarymen birge joıylyp ketýdiń aldynda turǵan baǵaly bekire tuqymdas balyq túrleri pen balyq ónimderiniń zańsyz aınalymyn anyqtaý, aldyn alý jáne jolyn kesý úshin ótkizilip jatyr. Іs-sharaǵa baılanysty «Atyraý-Reseı Federatsııasynyń shekarasy», «Atyraý-Aqtóbe», «Atyraý-Oral» jáne «Atyraý- Inder» baǵytyndaǵy respýblıkalyq, oblystyq mańyzy bar joldarda, Kaspıı teńiziniń, Jaıyq, Qıǵash ózenderiniń jaǵalaýynda 39 jyljymaly mobıldik top qyzmet atqarýda. Zańsyz balyq aýlaýdyń jolyn kesý úshin Jaıyq ózeni jaǵalaýyna 19 beınebaqylaý kamerasymen baqylaý júrgizilip otyr. Zańsyz balyq aýlaýshylarǵa qatysty 18 qylmystyq is qozǵaldy. Onyń ishinde 2 is QR Qylmystyq kodeksiniń 335-babymen (Balyq resýrstaryn zańsyz aýlaýmen), al, 16 is 339-babymen (Janýarlardyń sırek kezdesetin túrlerimen zańsyz aınalysý) tergelip jatyr», deıdi Nurhat Orazbaev.

Onyń aıtýynsha, polıtsııa qyzmetkerleri 28 sáýirde 36 jastaǵy áıeldiń turǵylyqty meken-jaıyna tintý júrgizgen. Sol kezde 15,8 keli bekire tuqymdas, 5 keli qara balyq tárkilengen. Qazir atalǵan derekke qatysty Qylmystyq kodekstiń 339-babynyń 1-bóligimen sotqa deıingi tergep-tekserý bastaldy.

Eske sala ketelik, buǵan deıin brakonerlerden 1 tonnaǵa jýyq bekire tárkilengenin habarlaǵan bolatynbyz.


Joǵary qaraı