Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Atyraýda 17 jasar jasóspirim Jaıyqqa batyp ketti

2021 jyldyń 3 tamyz 2021 19:40

ATYRAÝ. QazAqparat – Atyraýda 17 jasar jasóspirim Jaıyq ózenine batyp ketti, dep habarlaıdy QazAqparat.

Oblystyq tótenshe jaǵdaılar departamenti baspasóz qyzmetiniń málimetinshe, jyl basynan beri sý aıdyndarynda 21 adam batyp ketken. Onyń ishinde 7 bala bar. Al, qutqarylǵan 3 adamnyń ekeýi bala.

«2 tamyzda saǵat 19:14-te Atyraý qalasynyń mańyndaǵy Tomarly aýylynyń tusynda 17 jasar jasóspirimniń sýǵa batqany týraly habar tústi. Oqıǵa ornyna jedel jetken qutqarýshylar izdestirý-qutqarý jumystaryna kiristi. Súńgýirler keshki saǵat 21:03-te sýǵa batqan jasóspirimniń denesin taýyp, jaǵaǵa shyǵardy» -dep habarlady departamenttiń baspasóz qyzmeti.

Bıylǵy shomylý maýsymy bastalǵannan beri 356 profılaktıkalyq reıd ótkizilgen. Onyń ishinde 218 reıd polıtsııamen birlese júrgizilgen.

«Soǵan qaramastan, qutqarýshylar men polıtseılerdiń eskertýin elemeı, arnaıy belgilenbegen orynda sýǵa shomylatyndar azaımaı otyr. Polıtsııa qyzmetkerleri belgilenbegen oryndarda shomylǵandarǵa QR Ákimshilik quqyqbuzýshylyq týraly kodeksine sáıkes, 200 myń teńgeden astam aıyppul somasyn quraǵan 369 hattama toltyrdy» -dep málim etti baspasóz qyzmetinen.

Eske sala ketelik, budan buryn Atyraýda 47 jastaǵy er adam Jaıyq ózenine batyp ketken edi.


Joǵary qaraı