Aýa raıy
Astana +7 °S
Almaty +14 °S
valıýta baǵamy
USD 421.58
EUR 496.83
RUB 5.53
CNY 62.20

Atyraýda feldsherler klınıkalyq ólim belgisi bar adamdy qutqaryp qaldy

2021 jyldyń 21 qyrkúıek 2021 05:40

ATYRAÝ. QazAqparat – Atyraý oblysynda jedel járdem brıgadasynyń feldsherleri klınıkalyq ólim belgisi bar adamdy qutqaryp qaldy, dep habarlaıdy QazAqparat tilshisi.

Oblystyq densaýlyq saqtaý basqarmasy baspasóz qyzmetiniń málimetine súıensek, Jylyoı aýdandyq jedel járdem brıgadasynyń quramynda feldsherler Aıgúl Turabaeva, Janargúl Zaýlekenova, Qadyr Ibragım jáne Erlan Jasanov bolǵan.

«Biz shaqyrtýmen kelgende er adamda klınıkalyq ólimniń belgisi baıqaldy. Naýqasqa jedel reanımatsııalyq is-sharalardy bastadyq. Patsıenttiń júregi eki ret toqtady. Alaıda, biz defıbrıllıatordy qoldanyp, er adamnyń ómirin saqtap qaldyq», - deıdi feldsherdiń biri Erlan Jasanov.

Onyń aıtýynsha, feldsherler ólim aýzynda jatqan naýqastyń ómirin saqtaý úshin 20 jıyrma mınýttaı kúresken.

«Reanımatsııalyq is-sharanyń nátıjesinde er adamnyń júrek soǵysy qalpyna keldi. Birneshe mınýttan keıin ózdiginen tynys ala bastady. Naýqasty ókpeni jasandy jeldetý apparatyna qosyp, aýrýhanaǵa jetkizdik» -deıdi E.Jasanov.

Qazir ómirge qaıta oralǵan er adam jansaqtaý bóliminde jatyr. Onyń jaǵdaıy aýyr dep baǵalanady.

Eske sala ketelik, budan buryn Atyraýda júkti áıel jedel járdem kóliginde bosanǵanyn habarlaǵan bolatynbyz.

Avtor Bek Mustafa
Basty sózder: Oqıǵa, Medıtsına, Atyraý oblysy,
Joǵary qaraı